Willemstad – Maduro & Curiel’s Bank su brènch na Saliña ta kla pa sirbi’bo. Ku hopi plaser i orguyo, MCB a hasi apertura di su brènch moderno i inovativo na Saliña djarason dia 9 di yanüari ’19.

Un brènch espasioso ku teknologia moderno i un ambiente plasentero, pa fasilitá tur kliente pa hasi nan transakshon bankario personal.

Na momento ku e kliente drenta den brènch, nos embahadornan ta saludá kordialmente, ofresé asistensia personal mesora i ta dirigí e kliente na e área rekerí.

Den nos brènch na Saliña tin wifi disponibel pa Online i Mobile Banking. Ademas e brènch ta ofresé un área digital ku diferente tèblet disponibel i un persona ku ta asistí klientenan ku tur servisio online.

E área di Tèler tin un sistema nobo i moderno di cash recyclers, ku ta sòru pa prosesá transakshonnan na bali di un forma mas rápido i sigur.

Den brènch tin diferente pantaya digital ku ta indiká kambio di moneda, teps pa fasilitá e kliente pa hasi sierto transakshonnan, komo tambe diferente informashon di nos servisio i produktonan.

Pa fasilitá nos klientenan, tin 3 Bankomatiko parti paden di e brènch ku ta habrí 24 ora pa dia pa ofresé  servisio di depositá òf lanta plaka, hasi pago i rekargá telefon.

Hopi ta esnan ku ta gusta hasi uso di nos servisionan di Drive Thru, pues esaki tambe ta optenibel na nos Bankomatiko Drive-Thru i nos servisio di 24/7 Deposit Drive-Thru, pues e kliente no tin nodi di baha for di outo.

Nos ta yama un i tur, spesialmente nos klientenan, danki pa nan pasenshi durante e periodo di renovashon di nos brènch na Saliña i nos ta sumamente kontentu ku nos ta “ON’ pa sirbi tur kliente den nos brènch nobo, espasioso, ku teknologia moderno, ofresiendo un ambiente ameno pa bo hasi bo transakshonnan bankario personal.