Willemstad, — Teatro Luna Blou i La Tentashon ta presentá djasabra 16 di yüli i djadumingu 17 di yüli awor “Mas teater den bario” den sentro di bario Ser’i Papaya. Mas teater den bario ta un proyekto ku for di aña pasa a wòrdu inisiá pa Teatro Luna Blou i La Tentashon den kooperashon ku Kas di Kultura i SEFBA. E proyekto aki a keda finansiá pa Samenwerkende Fondsen Caribisch Gebied, Fonds voor Cultuur Participatie i Ministerio pa Kultura i Edukashon.
Durante di un aña largu e team di produkshon di teatro Luna Blou a duna vários tayer na diferente persona di 18 aña bai ariba. E kurso a enserá ku bo ta siña e diferente aspektonan ku bo mester sa, pa por organisá teater den un bario. Siman pasa tabata tin tres team ku a pasa nan eksamen ku éksito i awor a yega e ora pa nan por bai drenta bario i ehekutá e loke ku nan a siña. For di djaluna último e teamnan di produkshon Dreambow i A- Team ta na Ser”i papaya pa dunando tayernan na tur habitante di e bario. E tayernan ta kompletamente grátis. Huntu nan ta trahando riba un produkshon ku lo keda presentá djasabra i djadumingu awor. E intenshon ta pa e grupo ku keda forma ku habitantenan di e bario sigui hasi teater den e sentro di bario kontinuamente i natural bou di guia di teater Luna Blou.
Aparte di e presentashon di e bario lo tin presentashon di “The 20th A” i “ Nos Realidat”. E obra “The 20th A” ta un obra investigativo i kómiko. Durante di un selebrashon di 20 aniversario di Chriss ta sosodé un asesinato di kual no por sali afó ta ken a kometé e krímen. E obra ta bai den un flashback kaminda ku e públiko huntu ku e aktornan lo tin ku bai determiná ta ken a kometé e akto aki i dikon. E obra ta karga ku kosnan prèt pero tambe yen di akshon. E ta un obra musikal ku baile i kanto inkorporá den dje.
E obra “Nos realidat” ta un obra basa riba e bida di un artista eksitoso ku konstantemente ta mustra di ta felis. Pero tras di e felisidat ei hopi biaha tin un realidat amargo. Ana ta un artista eksitoso pero ku un pasado frustrante pero danki na su amistatnan e a logra yega kaminda e ta. E pregunta ta dikon Ana no ta felis apesar ku e tin tur kos fama plaka i mas?
Un invitashon ta bai pa pueblo di Kòrsou pa bin presensia e dos obranan aki i tambe e reto ku e team di produkshon di La Tentashon ta bai tin pa traha un obra den un siman ku habitantenan di e bario di Ser’i Papaya den e sentro di bario. Djadumingu 18:00 entrada Ang. 5, — Pa mas informashon por tuma kontakto ku koordinadónan di e proyekto pa teater Luna Blou na 522-8525 (Segni Bernardina) òf Lilimar Valencia(524-8525)