Awe kareda pa dama riba hilchi haltu

na Reinaissance Mall i Riff Fort 

WILLEMSTAD-JUNI 2013– Ya ta asina leu pa Renaissance Mall i Rif Fort presentá awe e di kuater edishon di e kareda pa dama riba hilchi haltu kombiná ku un eksposishon di beyesa i salú esaki komo klousura di Renaissance Mall i Riff Fort su kampaña dediká na nos hende muhénan “Ladies First Campaign”.

Awe, Djasabra promé di yüni nos damanan lo por disfrutá di un atardi plasentero kuminsando for di 3’or, pa esnan ku ainda ke partisipá por akudí 2’or di atardi pa inskripshon ‘last minute’. Pa 4’or di atardi lo duna inisio na e kompetensia riba hilchi ku lo terminá 5’or di atardi. Ta kòrda tur dama ku e hilchi di sapatu mester ta mínimo 9 centimeter haltu i 1 centimeter hanchu, e sapatu mester ta será òf mester tin strep, e sapatu no tin mag di pasa ènkel, no tin mag di bisti mea ni sapatu ku hilchi yená, no tin mag di usa tape, e sapatu mester keda den su estado original, mester yega final di e kareda ku ámbos sapatu na pia i  no tin mag di pusha, dal òf blòkia otro partisipante durante e kareda. Por haña e reglanan di e “Stiletto Run” riba  e Facebook page di Renaissance Mall & Rif Fort. Lo tin premio pa vários kategoria, asina por menshoná ku tin premio pa e partisipante ku kore mas duru, premio pa e sapatu i vestuario mas kreativo. E aña aki lo tin un total di 3 kareda; lo repartí tur partisipante den dos grupo i e ganadornan di ámbos grupo lo kore kontra di otro den e kareda final pa asina saka e ganador apsoluto. E seremonia di premio lo wòrdu tene entre 6’or di atardi i 7’or di anochi. Durante hinter e evento lo tin músika bibu na enkargo di Dj NRG.  Tur dama lo risibí un pakete di premio i e dama ku gana e kareda lo risibí 1,000 florin na ‘shopping’ den Renaissance Mall i Riff Fort. Bo ta keda invitá pa bin mira e kareda riba hilchi haltu!