Bright Bakery a bira partner di e fundacion
ORANJESTAD, Aruba – 13 di November 2017: Den luna di Juli ultimo, Bright Bakery a acerca Mary Joan Foundation pa nan traha hunto y conscientisa comunidad durante luna di October cu ta luna di conscientisacion di cancer di pecho. E aña aki e fundacion a ricibi ayudo di hopi negoshi, cu a yuda nan yega na fondo pa sigui conscientisa comunidad riba cancer di pecho.
Arabella Reyes, Presidente di Mary Joan Foundation a indica cu Bright Bakery a bin cu e idea pa Mary Joan Foundation duna algun tip con pa haci saminacion propio. Mary Joan Foundation a tuma e idea aki y asina tambe di nan parti a duna Bright Bakery e honor di ta e prome compania pa haci uzo di nan logo nobo. A realisa e proyecto den luna di October unda cu a inclui e logo nobo di Mary Joan Foundation riba e saconan di pan, kipashi bruin, kipashi blanco y buns. Tambe a imprimi tipnan con pa haci saminacion propio di bo pechonan riba e saconan di pan.
Cu cada compra di pan di Bright Bakery durante luna di October, nan a haci un contribucion na Mary Joan Foundation. E campaña a yega su fin y diabierna, pa cual Cedric & Sulyienne Croes di Bright Bakery a haci entrega di un cheque p’e suma di AWG 10.000,- na Mary Joan Foundation. E suma total cu nan a recauda como fondo pa sigui traha riba e conscientisacion, Mary Joan Foundation a cera luna di October cu e suma di 33.926 florin y ta gradici tur cu a haci donacion.
Mary Joan Foundation a gradici tur comerciante cu a yuda nan yega na fondonan pa por sigui conscientisa comunidad riba cancer di pecho. Sin lubida riba comunidad, cu ta respalda nan pa 10 aña y e fundacion ta gradici p’e sosten.
Otro aña un biaha mas den luna di October, Bright Bakery lo ta partner cu Mary Joan Foundation unda lo uza e saconan di pan pa sigui conscientisa comunidad di Aruba riba e importancia di controla bo pecho. Bright Bakery y Mary Joan Foundation ta yama henter comunidad di Aruba masha danki pa e confianza deposita den nan. Corda cu no mester enfrenta cancer di pecho bo so! Mary Joan Foundation t’ey.