Djadumingu awor, kampaña ‘Kòrsou ta Dushi. Bib’é. Stim’é.’ ta organisá

WILLEMSTAD- Desèmber 2017 – Djadumingu awor, dia 10 di desèmber ta tuma lugá ‘Marshe Kòrsou ta Dushi’ na Parke Himno i Bandera na Barber. Manera ta konosí na  luna di sèptèmber último Ofisina di Turismo di Kòrsou (CTB) a lansa su kampaña nobo di konsientisashon ‘Kòrsou ta Dushi. Bib’é. Stim’é.’ Meta di e kampaña ta pa konsientisá habitantenan di Kòrsou riba e privilegio di ta biba na Kòrsou i di ta forma parti di e komunidat di Kòrsou. E kampaña ta dirigí riba nos komunidat kompletu i ta stimulá pa hasi nos mas orguyoso di nos kultura, naturalesa i historia.

Den kuadro di e kampaña lo bai drenta djadumingu awor den aria di Bándabou pa trese e kampaña mas serka di e pueblo di Bándabou. Durante di e marshe lo bai tin diferente stènt di informashon edukativo, workshop di pintamentu, charla, benta di produktonan elaborá na Kòrsou, diferente tour den aria di Bándabou, masashi i hopi mas, tur na preis super atraktivo. Naturalmente nos kushina krioyo no por falta. Tambe lo tin presentashon di grupo di baile folklóriko SAK, Típiko San Mangó, Grupo Kompèr i pa klousura presentashon di Gentz Tre’Chic i un bunita show di vürwèrk. Djadumingu 10 di desèmber di 10or di mainta pa 9or di anochi na Parke Himno i Bandera bo mester ta! ‘Kòrsou ta Dushi. Bib’é. Stim’é. Pa mas informashon bishitá www.korsoutadushi.com