WILLEMSTAD –Curaçao Marriott Beach Resort ainda den fase di renovashon ta brinda spesialmente esnan ku ta ambishoná un futuro den kushina òf sirbishi (food & beverage) un oportunidat pa sigui un formashon dirigí pa despues hasta duna e mihó kandidatonan ku pashon pa e funshon un trabou na e hotèl ora e habri mas den fin di aña. Esnan ku tin interes pa esaki tin te mas tardá dia 12 di yüli pa mèldu na Uitzendbureau Impacto na Scharlooweg 19.

Den un intento pa yuda mas tantu empleado lokal posibel haña un trabou den e kushinanan i sekshon di F&B di e hotèl renobá na Parasasa, a prepará konforme e normanan di Marriott un programa grátis spesífikamente pa dos área. E programanan no ta tantu pa hende ku ta trahando kaba den e ramo, pero hustamente pa esnan ku no ta traha den dje ainda pero ku ta anhelá pa desaroyá den e direkshon aki.

Programa kulinario

Ku niun gastu envolví Marriott ta ofresé un programa di sertifikashon kulinario di 3 luna pa esnan ku demostrá un pashon pa kushinamentu den tur su aspektonan i ku ke haña trabou tambe den e ramo ei. E programa pa asistente den kushina nivel 1 ta konsistí di 8 seshon di anochi den siman di 6 or di atardi pa mitar di 9 anochi i 6 seshon riba djasabra di 4 or di atardi pa 7 or di anochi. Interesadonan mester formulá un karta pa motivá nan partisipashon na e programa, kombiná ku un curriculum vitae i entregá esaki na tempu na Impacto. Ta rekerí di e kandidatonan ku nan tin heful pa dunamentu di servisio, ku nan ta disponé di bon abilidat komunikativo i por traha den tim. Eksperensia previo den e ramo no ta nesesario. Ademas ta spera ku nan ta dominá Hulandes i Papiamentu. Den e periodo di 29 di yüli pa 19 di òktober nan mester por sigui e programa kompleto riba e anochi i wikèntnan konserní. Esnan ku hasi esei i pasa èksamen ku éksito, ta risibí un sertifikado. Marriott ta ofresé e 10 mihó studiantenan un trabou den e hotèl ku pronto lo habri.

Kurso di F&B

Virtualmente di mes manera Marriott ta duna oportunidat na otronan ku un pashon pa por  sirbi i ku ta ambishiná un karera den e ramo aki, pa sigui un kurso di 2 luna. Ta duna e kurso grátis aki di F&B den e periodo di 29 di yüli pa 19 di òktober repartí den 6 seshon den siman di 6 or di atardi pa mitar di 9 di anochi i 6 seshon riba djasabra di 4 or di atardi pa 7 or di anochi. Aki tambe ta spera ku interesadonan tin sentimentu pa dunamentu di servisio, ta disponé di bon abilidatnan komunikativo i por traha den tim. Nan tambe mester motivá nan partisipashon na e kurso den un karta, kombiná ku un CV kòrtiku, ku nan tin di entregá na tempu na Impacto. Ademas, nan mester por ekspresá bon na Ingles i ta fleksibel pa por sigui e lèsnan den siman anochi i den fin di siman. Nan no tin di tin eksperensia den e ramo ainda. Esnan ku sigui e kurso kompletamente i ku ta finalisá esaki ku bon resultado, ta risibí un sertifikado. Den e kaso aki tambe e 10 mihó alumnonan ta haña un oferta pa un trabou na Marriott.

Job Fair riba 27 di yüli

Mas en general Curaçao Marriott Beach Resort ta hasiendo e trámitenan pa un ‘Job Fair’ (marshe di trabou) riba djasabra 27 di yüli den ouditorio di International School of Curaçao (ISC) na Emmastad. Aya entre 8 or di mainta i 3 or di mèrdia interesadonan por haña informashon di puestonan habrí, pero nan por solisitá tambe mesora pa puestonan ku bini disponibel na momento ku mas lat e aña aki e hotèl habri su portanan. Por presentá e kartanan di solisitut na e Job Fair. Por haña mas informashon riba e página di Facebook ‘Curaçao Marriott Beach Resort careers and community’.

Asina Marriott ta brinda bastante oportunidatnan nobo di karera riba merkado laboral di Kòrsou.