Ehecutivonan a presenta e “brand” den tur su facetanan

ORANJESTAD, Aruba – 4 di juli 2016: Recientemente Marriott Resort Aruba & Stellaris Casino a organisa e asina yama “Mash Up”, un reunion organisa un biaha pa aña, na unda tur empleado ta invita pa haya un “update” di loke e “Marriott brand” ta representa. Durante di “Mash Up” e ekipo di gerencia di e hotel ta presenta diferente topico cu ta di interes general pa e empleadonan, manera e filosofia di e compania y e “ultimo noticia” riba cambionan cu a y ta tumando luga tanto localmente como internacionalmente.

Ademas, a presenta temanan manera ehercicio, maneho di stress y nutricion, pa asina yuda e empleadonan crea balans den nan bida. “Wellness”, o sea bienestar, ta un topico cu ta ricibi hopi atencion di parti di ehecutivonan di e hotel, cu tin como vision pa yuda su empleadonan ta mas saludabel den tur area di nan bida. A parti e sesionnan den cuater topico, esta “Do”, “Think”, “Brand” y “Wellness” y a keda presenta den un forma hopi interactivo. Ruthline Tromp-Theysen, kende ta e “Complex Director of Human Resources”, a remarca cu a pone hopi enfasis riba “branding” cu Marriott su staf y personal ta refleha, esta di ta “brilliant hosts”. El a splica cu recientemente Marriott International a introduci “appearance standards” nobo, unda cu ta permiti hende homber pa bisti renchi horea, pa tin barba y pa tin cabey largo y en general ta permiti pa hende muhe y hende homber tin tattoo.

Tur e standardnan modernisa aki ta mara na cierto regla, cu a presenta den un estilo di “Project Runway” pa e empleadonan por observa “kico si” y “kico no” ta permiti. E “business look” awendia ta uno mas moderno y ta adapta e standard di apariencia pa empleadonan di Marriott International na e desaroyonan di comunidadnan internacional. Ben Figaroa, General Manager di Stellaris Casino, kende a presenta e “runway” hunto cu Ruthline Tromp-Theysen, a splica cu un punto di enfoke grandi ta e calidad di bida di empleadonan. El a agrega cu e bienestar di e empleadonan ta masha importante y e proceso pa yuda nan yega na un balans ta continuo.

E presentacion riba e tema “wellness” a inclui tambe diferente ehempel di ehercicio y informacion tocante con pa probecha miho di e cumindanan ofreci den e cafetaria pa un miho maneho di nutricion, tanto pa e parti di salud, como e parti di maneho di peso. Hotel Manager Leslie Prea y Director of Revenue Aisling Seberry tabata encarga cu a sesion aki. E empleadonan tambe a ricibi un presentacion riba “mixology” di parti di Complex Director of Food and Beverage Joerg Delin, pa asina nan ta “al dia” cu e bebidanan nobo cu nan huespednan ta wordo ofreci na e barnan y restaurantnan. Complex Director of Finance Raymond Habibe a presenta e sesion Marriott Brand.
Complex General Manager di Marriott Resort Aruba & Stellaris Casino, esta Tom Calame, a completa e dia cu informacion extenso riba tur desaroyonan nobo den e compania, tanto riba tereno di infrastructura como e aspecto di recursonan humano. Aruba Marriott Resort & Stellaris Casino a habri na aña 1995 cu 413 camber. Na aña 1999 a habri Ocean Club cu 311 camber y na aña 2004 a habri Surfclub cu 900 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.