Erwin Noguera, General Manager di Marriott Aruba Ocean Club Huespednan ta duna bon comentario di e empleadonan aki

ORANJESTAD, Aruba – 15 di Mei 2017: Ora cu huespednan di Marriott Aruba regresa nan cas, nan ta haya un encuesta di nan estadia y ta skirbi nomber di cada empleado cu a haci impacto riba nan vakantie. Marriott Aruba a celebra e logro di “100 Way to go” di e empleadonan Edward Wolter (bartender), Pedro Uzcategui (waiter di Poolbar Beach & Grill), Melveta Johnson (Towel hut) y Marvin Leonides (Front Desk) cu a sobresali den nan area na Marriott Aruba y cu a contribui significante na e experiencia di e huespednan.

Diahuebs e compleho di hotelnan Marriott na Aruba a celebra cu e cuater empleadonan aki, pa nan logro cu ta uno tremendo, Erwin Noguera, General Manager di Marriott Aruba Ocean Club, a remarca y a haci esaki hunto cu famia y coleganan di e empleadonan.

“Nos kier pa pueblo mira cu na Marriott Aruba e doñonan di timeshare ta esunnan cu ta aprecia e empleado y nos ta apoy’e cu e programanan aki”, Erwin Noguera a remarca. Aki por mira e aprecio cu Marriott Aruba ta duna pero tambe e doñonan di timeshare cu ta inverti nan placa pa bin pasa vakantie na Aruba. Ta e empleadonan aki ta haci un impacto cu e hendenan aki kier regresa tur aña. Mester corda cu e timeshare di Marriott Aruba por bishita esaki na 54 hotel rond mundo. “Pa mi bin bek Aruba tur aña, pa pasobra algo special tin y nan ta esunnan cu ta haci esaki special”, Erwin Noguera a remarca. Melvita Johnson ta traha na  Marriott y e ta traha den e area di recreacion di towel hut na Marriott Ocean Club. “Mi a contribui cu e huesped, mi ta amabel cun’e, ora cu nan bin puntra algo mi ta eynan pa duna nan contesta, tambe pa duna nan serbete ora cu nan bin”, Melveta Johnson a duna di conoce. Na momento cu e huespednan yega cerca Melveta Johnson, e ta percura pa smile cu nan pa asina cu nan regresa y puntra pa Melveta, e ta sinta eynan pa atende nan.

Marvin Leonides ta traha den e area di Front Desk y tambe ta un empleado cu a logra yega na e premio di “100 way to go” pasobra huespednan a gusta con e ta trata nan. “Basicamente bo ta scucha e necesidadnan di e huespednan. Kico tur nan ta pidi bo na momento di e biahe largo cu nan a yega. Por ta cu nan maleta no a yega of no a haya e camber cu nan ta buscando of falta 1 anochi y tur eseynan ta cosnan chikito cu bo tin cu paga tino cune”, Marvin Leonides a remarca. Scucha e huespednan pasobra nan mes ta bisa kico tur nan mester pa nan estadia. Di eynan nan ta bin na e reconocemento cu e persona aki a yuda bon sea cu maleta of cu e anochi of cualkier otro cos cu nan ta rekeri durante nan estadia.

Marvin Leonides ta corda cu un biaha un guest a trece na su atencion cu el a laga su cartera na un otro hotel y nan a bay cana rond di pool pa busca e cartera y eigenlijk esey no tabatin nada ke haber cu e hotel. “Mi por a djis bis’e tuma un taxi y bay na e hotel pa busca e cos, pero esaki no ta e manera con nos ta haci”, el a remarca. Na Marriott nan ta haci todo por todo pa turista cu ta keda na e hotel of riba e isla. Edward Wolter ta bartender y pa e por a yega na e “100 Way to go”, el a haci e esfuerso di yuda e huespednan te unda cu e por. “Haci nan contento, p’esey nan ta bin Aruba y duna mas di loke nos tin, mas cu e 100%”, Edward Wolter a remarca. Loke ta inspira Edward Wolter pa yega tur dia trabou, ta cu tur dia tin algo diferente. Esey ta haci cu tur dia e kier yega trabou y mira kico tin pa mañan. “Tur dia bo ta haci’e diferente y bo ta haci un tiki mas semper y awe e ta mas miho”, el a remarca.

Internacionalmente e reconocimento pa empleadonan mas prestigioso den e compania Marriott Vacation Club International (MVW) ta e “Way To Go!” Awards. Ta trata aki di e comentarionan positivo for di nan miembro y huespednan. Localmente tambe Aruba Marriott tin un programa di incentivo basa riba e programa internacional y durante di henter aña ta honra empleadonan cu ta destaca cu diferente regalo y gestonan di aprecio. No ta prome bes cu empleadonan di Aruba ta ricibi e distincion aki, pasobra desde aña 2013 e compleho di Marriott na Aruba ta mandando empleadonan cu a hasta surpasa 200 comentario positivo, pa atende un evento na Orlando cu 100 mil otro empleadonan di Marriott rond mundo.

Marriott Resort a habri na Aruba na aña 1995 cu 413 camber. Na aña 1999 a habri Ocean Surf Club cu 311 camber y na aña 2004 a habri Surf Club cu 450 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.