Willemstad – aprel 2015: Wikènt ku a pasa a tuma lugá e di 3 edishon di ENNIA Sprint Triatlon na Kokomo Beach. Den kategoria di adulto Jeritsandro Martin, Marlies Kort i e tim di relay Duty Calls, respektivamente den kategorianan kabayero, dama i relay a finalisá na promé lugá. Ganadó overòl a bira Marlies Kort ku un tempu di 1 ora, 11 minüt i 32 sekònde.
Marlies Kort a finalisá komo e mihó di tur atleta. “ Mi ta hopi satisfecho ku mi resultado. Mi ta, pa loke mi mes por a mira i tambe midi na tempu, rùim 2 minüt mas lihé ku aña pasá. Ta dushi ora bo por sigui mehorá bo mes”, sigun Marlies. “Semper ta un bon tèst pa bo mira si bo training ta funshoná,” E ke pone kandela na e kampionato mundial na Austria, ku ta tuma lugá dia 30 di ougùstùs. “ENNIA Sprint Triathlon i ENNIA Curaçao International Triathlon ta momentunan ideal pa tèst.”, sigun e triatleta.
Den kategoria kabayero individual Gijs Hendriks a finalisá despues di Jertisandro Martien ku un tempu di 1 ora 14 minüt i 3 sekònde. Na di 3 lugá a finalisá Casper Camps. El a kaba 17 sekònde mas lat ku number 2. Den kategoria di dama Petra Vermeer a finalisá rùim un kuart’i ora despues di Marlies Kort na di 2 lugá. Tamara Brank a kaba ku un tempu di 1 ora, 28 minüt i 44 sekònde na di 3 lugá.
Sigur 100 deportista a partisipá na ENNIA Sprint Triathlon. Curaçao Triathlon Association a organisá e evento. E adultonan mester a landa 750 meter, kore baiskel 20 kilometer i kore duru 5 km. E kompetensha tabata habrí pa tantu triatletanan versá komo esnan prinsipiante entre 15 pa 80 aña.
ENNIA Kids Triathlon
Djasabra ta e muchanan ku a bini for di Aruba a destaká. Christiaan Jansen di Aruba a gana den kategoria di edat 6 pa 8 aña den 13:26 minüt. Den kategoria di mucha hòmber entre 9 i 11 aña Justin Morales, tambe di Aruba a gana den 21:55 minüt. Giannon Eights, tambe prosediente di Aruba, a kaba na promé lugá den kategoria 12 te ku 14 aña ku un tempu di 33:18 minüt. Power Boys a gana den kategoria di tim di relay ku un tempu di 31:44 minüt. Den kategoria di mucha muhé entre 6 pa 8 aña Ella Vermeer a gana e premio pa mihó tempu. Den kategoria di mucha muhé entre 9 i 11 aña Josha Vermeer a gana.
E ENNIA Sprint Triathlon na Kokomo tabata un evento pa kalentá pa ENNIA Curaçao International Triathlon ku ta tuma lugá djadumingu 24 di mei na Santa Barbara Golf & Beach Resort. E distanshanan pa e triatlòn akí ta: landamentu 1,5 km, kareda di baiskel 40 km i 10 km korementu duru. Tim di relay tambe por partisipá. Por haña mas informashon riba www.triatlon-Curacao.com i via numbernan di telefon 540 4321 / 515 5005