Willemstad – E luna aki Marcel Dennert (55) a kuminsá komo direktor nobo di Stichting Monumentenzorg Curaçao. Dennert ta remplasá George Schmit ku pa e ultimo añanan a fungi komo direktor di e fundashon. Na òktober Schmit ta tuma despedida despues di 17 aña den servisio di Stichting Monumentenzorg Curaçao. Dennert su estudio tabata riba tereno di planológiko/arkitektóniko i e tin hopi eksperensia den maneho i mantenshon di biennan inmóbil. Mantenshon di edifisionan semper a kapta su atenshon. El a haña eksperensia dor di traha riba diferente proyekto durante su karera, spesífikamente durante su trabounan na NV Stadsherstel Willemstad. Den su funshon nobo Dennert ta garantisá ku Stichting Monumentenzorg i NV Stadsherstel Willemstad  ta keda ku e lasonan ku nan tin aktualmente i ku posibilidat di bira mas estrecho den futuro. Tur dos organisashon ta sosio den Sosiedat Públiko Fleur de Marie. Stichting Monumentenzorg Curaçao tin komo tarea pa kumpra, restourá i mantené edifisionan ku ta forma parti di e herensia kultural di Kòrsou. Ophetivo ta pa konservá esakinan pa generashonnan di futuro.  E fundashon ta haña entrada i medionan pa finansiá trabounan di restourashon dor di hür e edifisionan ku ya ta renobá na empresanan i otro establesimentunan. Pa mas informashon tokante Stichting Monumtenzorg Curaçao por wak nan website www.monumentenzorg.cw òf like página riba Facebook.