E formashon musikal Mara y Los 9 Del Barrio ta lansa single nobo riba merkado “Tata Danki” dia 19  december proksimo. E single aki ta unu kaminda Mara ta jama danki na Dios. Skuchando un piesa Afrikano Mara a hanja e inspirashon pa skirbi pa jama danki na nos Ser Supremo pa tur loke a pasa i a keda sin pasa den e anja ku ta jegando su fin aki. No a dura muchu largu ora Mara a drenta den kontakto ku Michelangelo “Amadu” Catal pa e single kuminsa kue forma. Michelangelo a drenta studio i kuminsa graba i asina den menos ku dos luna “Tata Danki” a bira realidad.

Mara ta bisa ku esaki ta un uitstapje den muziek Afrikano, ku ta un muzik ku Mara ta admira masha hopi mes. Pero ku su tumbao tei ketu bai i ku ahinda e ta trahando duru den studio riba su projekto internashonal kual ta konsisti di ritmonan Latino i ta na idioma Spanjo. Anja pasa nos tabata testigu di esaki ora ela lansa su prome single ku titulo YDK, yu di Kòrsou. Un tremendo salsa kaminda e ta broma nos dushi Kòrsou i kon orgujoso e ta, di ta un yu di Kòrsou.

Pa “Tata Danki” bira realidad, Mara tabata tin e plaser di graba den e studio di Reno Martis kaminda semper tin un ambiente masha ameno, ku bo ta sintibu den famia. “Mi tabatin e gran honor di graba ku Kweku Mensah, un gitarista renombra di Ghana” Mara ta bisa. “Un hende masha humilde i ku masha grasia”.  Tambe manera semper den su banda su kasá Noibe Girigorie ku a toka bas i kanta koro pe. I e sorpresa di e single ta ku Mara i Noibe su yu menor di 9 anja Myeesha, tambe a kanta koro huntu ku Papa i Mama. Enkarga di e mixing i mastering tabata Chelo Ignacio ku a sa manera semper di hasi un tremendo trabou. Last but not least Mara kier jama un danki speshal na Michelangelo “Amadu” Catal, ku a hinka asina tantu tempu, dedikashon i inspirashon pa produsi e single aki. Kaminda Amadu ta, niun hende no por drumi.

E Afro-pop single “Tata Danki” lo wòrdu estrena na e konosido radionan lokal i tambe riba nos pagina di facebook: https://www.facebook.com/MARAyL9DB/ Bishita nos pagina di Facebook, like i share nos pagina i den bo inbox bo ta risibi e single “Tata Danki” gratis.