Willemstad: Djarason 16 di ougùstùs 2016, JCI United Citizens of Curaçao lo start ku su di dos edishon di e proyekto, “Manera mi bos, no tin dos”.  Den e proyekto aki e hóben lo wòrdu ekipá ku konosementu kon pa hiba un diskurso,  kon pa ekspresá su mes, formulá i defende su opinion a base di bon argumentashon i echonan.

JCI su meta prinsipal ta pa trese kambio positivo den komunidat dor di ehekutá diferente proyekto i evento ku ta aportá  na  komunidat di Kòrsou den un forma positivo i duradero.

Aña pasa e proyekto a hasi un impakto grandi bou di nos hóbennan i JCI  United Citizens of Curaçao a logra gana diferente premionan riba nivel nashonal i internashonal.                                                                                                     Pa sigui aportá na e desaroyo efektivo i duradero di nos hóbennan,  JCI United Citizens of Curaçao a opta pa organisá un di dos edishon di e proyekto : “Manera mi Bos No tin Dos”.

E aña aki JCI United Citizens of Curaçao tin e oportunidat di traha un biaha mas ku Toastmaster International, Fundashon Kalidat Profeshonal Edukashon Kòrsou (KPEK) i tambe Biblioteka Nashonal di Kòrsou.

E proyekto aki ta partí den dos fase. E promé fase ta e parti preparatorio i e di dos fase ta e kompetensia di debate.

E fase preparatorio lo dura di ougùstùs pa òktober. Durante e periodo aki e hóben lo partisipá na diferente training, manera di “Speech craft” ; “Abilidat pa debate” ; “Kontenido di e 17 metanan sostenibel di Nashonnan  Uní ”;  i tambe un kurso básiko di papiamento. E parti preparatorio lo kulminá ku un tremendo kompetensia di debate den luna di novèmber.

Den e fase di kompetensia di debate e hóben ta haña e oportunidat pa pone tur loke ku el a siña den praktika i esaki lo tuma lugá den luna di novèmber. E parti di debate lo stimulá e hóben pa pensa kritiko, komuniká efektivo i tambe traha efisiente i produktivo den tim.

“Manera mi Bos, no tin Dos”, lo ekipá nos hóbennan ku e abilidat nesesario pa por presta mihó na skol, den nan futuro karera i alabes forma i kapasita nan pa por funhí komo lidernan den nos komunidat i tambe kumpli ku nan responsabilidat komo suidadano aktivo den un sosiedat demokratiko.

 

Ahinda a sobra algun lugá, si bo ta un hóben entre 14 pa 21 aña, no pèrdè e oportunidat aki i registrá pa bo tambe partisipá na e proyekto aki.

Partispashon ta kompletamente gratis.

Pa mas informashon por bishitá nos pagina di facebook “Maneramibosnotindos” òf mail nos na:

maneramibonotindos@gmail.com