Mas ku un kompetensha di debate
WILLEMSTAD – 8 di yüni último JCI United Citizens of Curaҫao (JCI UC) a lansa e di dos edishon di e proyekto “Manera mi BOS, no tin DOS”.
Despues ku e promé edishon di “Manera mi BOS, no tin DOS” tabata tin un impakto imenso den nos komunidat, i a gana premionan riba nivel nashonal i internashonal, JCI UC a opta pa organisá un di dos edishon di “Manera mi BOS, no tin DOS” di manera ku por brinda e eksperensia aki na mas hóben. E aña aki JCI UC tin e honor di por traha un biaha mas den kolaborashon ku Toastmasters International, Fundashon Kalidat Profeshonal Edukashonal Kòrsou (KPEK) i tambe Biblioteka Nashonal Kòrsou (BNK), pa organisá e proyekto aki ku ta bai tuma lugá den e periodo di ougùstùs pa novèmber 2016.
Meta di e proyekto aki ta pa konsientisá nos hóbennan di kon importante ta pa por tin e abilidat pa duna un diskurso, tambe kon pa por ekspresá nan mes formando nan propio opinion abase di bon argumentashon i echo. Durante e trayekto e hóbennan lo haña diferente kurso, manera ‘Speech Craft’, abilidat pa debatí, kontenido di e 17 metanan sustenibel di Nashonnan Uní i tambe kurso básiko di Papiamentu. Esakinan ta presparashon ku lo bai kulminá den un gran kompetensha di debate kaminda nos hóbennan ta haña e oportunidat pa pone den praktika tur loke nan a siña.
E proseso di debate ta ofresé benefisionan profundo i duradero na nos hóbennan i alabes na nos komunidat, ku énfasis riba pensamentu kritiko, komunikashon efektivo, investigashon independiente i tambe kon pa traha efisiente i produktivo den tim. “Manera mi BOS, no tin DOS” ta duna nos hóbennan e abilidat nesasario pa por presta miho na skol, den nan futuro karera, i alabes e formashon pa por funhí komo lídernan kapasitá den nos komunidat i tambe pa kumpli ku nan responsabilidat komo siudadano aktivo den un sosiedat demokrátiko. Pues si abo ta un hóben entre 14 pa 21 aña, no pèrdè e oprtunidat aki i registrá pa bo tambe forma parti di un eksperensia inolvidabel. Pa mas informashon por bishitá nos página di Facebook www.facebook.com/maneramibosnotindos òf manda nos un karta na maneramibosnotindos@gmail.com