WILLEMSTAD – JCI United CItezens of Curaçao den kolaborashon ku fundashon KPEK, Klupnan di Toastmasters International na Kòrsou, i Biblioteka Nashonal Kòrsou a lansa oficialmente e proyekto Manera mi bos, no tin dos. Manera mi bos, no tin dos ta un kompetensha di debate ku ta bai tuma lugá den e aña eskolar aki di 2014 pa 2015. Den e kompetensha di debate tur hóben entre 14 pa 24 aña por partisipá. Na e momentu nan aki, inskripshon a habri kaba i ta sera djaweps, 21 di Ougùstùs. Tur hóbeninteresá por buska e formulario di inskripshon riba nos página di facebook. Despues di a yena e formulario di inskripshon tin di manda esaki na maneramibosnotindos@gmail.com. E trayektoria di Manera mi bos, no tin dos ta repartí den dos periodo. E promé parti ta esun preparatorio kaminda miembronan di Toastmasters lo duna kurso esensial pa prepará kada partisipante pa e kompetensha di debate. Na final kada hóben lo risibí nan sertifikado komo prueba di nan partisipashon na e kursonan. Esaki sigur lo ta un balor agregá pa ku nan desaroyo personal den nan bida komo studiante i tambe nan karera profeshonal. Fundashon KPEK na su turno ta bai trata varios di e topikonan ku ta bai tin durante e kompetensha di debate pa asina amplia kada hóben su konosementu general. E di dos parti ta e kompetensha di debate. Aki nan tur tim ta bai kompetí kontra di otro te ora yega e parti eliminatorio. A base di e kantidat di inskripshon ku nos risibí por definí kuantu ròndu ta bai tin. E lokalidat pa e kursonan i kompetensha di debate pa gran parti lo tuma lugá na Biblioteka Nashonal Kòrsou. Aparte di esaki Biblioteka lo funhí komo fuente di informashon i tambe inspirashon pa ku e kontenido di e debate. E partisipantenan lo risibí tur material nesesario pa por partisipá aktivamente na e kursonan. E proyekto tin un durashon di 7 luna i tur kos ta kuminsá den luna di Sèptèmberpróksimo. Unabes ku inskribí e partisipante ta risibí e skèdjul di kurso. Danki na Fundashon KPEK, Klupnan di Toastmasters International na Kòrsou, Biblioteka Nashonal Kòrsou, MCB bo banku amigu komo patrosinador tur e hóben ku ta partisipá por risibi kursonan sin ningun kosto.