WILLEMSTAD – Siman pasá riba djaluna 24 di Novèmber i djamars 25 di Novèmber e hóbennan di Manera mi bos no tin dos a finalisá nan promé kurso kual ta ‘Speech Craft’ na bIblioteka Nashonal Kòrsou i St. Jozef. Ta asina ku kada hóben mester a duna un presentashon di no menos ku tres minüt i pone den praktika tur lokual nan a siña durante e periodo di kurso. Tabata un momentu di orguyo pa JCI United Citizens of Curacao mira nos hóbennan destaká i demostrá ku nan tin hopi kurashi i talento pa por duna un bon presentashon i alabes laga nan bos resoná. Klupnan di Toastmaster, kende a keda enkargá ku e seshonnan di ‘Speech Craft’ por mira bèk riba un periodo fenomenal i eksitoso. Tur hóben a risibí un sertifikado komo muestra di nan partisipashon i rekonosementu pa ku nan esfuerso. Esaki sigur ta algu ku nan por hasi uzo di dje den futuro. Den luna di yanuari 2015 tur kos lo kontinuá pa asina e hóbennan por risibí e sobra tayernan ku lo trata abilidatnan pa debatí, nos dushi idioma Papiamentu, i tambe e topikonan ku ta bai bin dilanti durante e kompetensha di debate. Despues di e fase preparativo nos tin sigur ku nos hóbennan ta bai ta kompletamente kla pa debatí kontra di otro riba nivel basá riba bon argumentashon  i konosementu den luna di Mart 2015.