Den rating positivo di Fitch

Den su evaluacion recien Fitch ratings ta reafirma cu Aruba tin perspectiva stabiel y na mes momento ta confirma un biaha mas, cu turismo ta hunga un rol den henter e desaroyo economico di nos pais.  E decision di Fitch ta pa mantene e rating di Aruba na “BBB-“! E instancia financiero internacional ta resalta e resultadonan positivo di nos turismo, specialmente for di Merca, superando e averahe di Caribe! Ta informa entre otro cu  Turismo ta e sector dominante y ta mustra riba resultadonan positivo den e sector aki pa loke tabata 2015.

Fitch den su reportahe ta mustra cu nan ta reconoce cu for di e mercado principal cu ta Merca caminda a bin  conoce un crecemento di 7.7 %. Esaki ta pone Aruba den un posicion halto compara cu otro destinacionnan den Caribe. Den e mesun reportahe Fitch ta indica di premira cu e tendencia positivo aki lo continua pa aña 2016. Minister Otmar Oduber ta orguyoso di e resultado aki mirando cu e esfuersonan y trabou duro di e maneho di Ministerio di Turismo, ATA y AAA no ta envano.

Sin duda henter pueblo mester ta sumamente contento y orguyoso di esaki ya cu mientras cu tin politiconan di oposicion ta sigui pronostica desaster pa turismo di Aruba, varios instancia renombra ta mustra net lo contrario. Na luga di nan uni na e desaroyo positivo aki dunando recomendacionnan positivo y efectivo, un politico manera Dangui Oduber ta perde den un lama di mentira y ta sigui sembra negativismo caminda e no tin e curashi di bin dilanti y sostene un maneho di turismo cu a yuda na consolida economia di nos pais.

Fuera di e ultimo reportahe positivo di Fitch, tin otro instancianan manera Banco Central di Aruba, Raad van Advies y tambe CFT of CAFT aki na Aruba, cu tambe ta reconoce e desaroyo positivo y sumamente efectivo cu Aruba a conoce den su maneho di turismo for di 2009 na momento cu Minister Otmar Oduber a asumi responsabilidad di e sector aki.