Kòrsou ta kampeon!

Willemstad – Maduro & Curiel’s Bank komo spònser prinsipal, a invitá hungadónan, direktiva i e coachnan di CSB ku a sali kampeon Suramerikano na Ecuador, pa un selebrashon.

For di aña 2013 MCB a kuminsá spònser CSB pa sòftbòl di damas ku sosten finansiero i otro forma di sosten, pa engrandesé e deporte bou di nos hóbennan. Ku e meta pa kontribuí na halsa e nivel kompetitivo, elevá e kalidat di ekipo, krea fasilidatnan pa trein, drecha infrastruktura i inkorporá coaching pa por kompetí internashonalmente. Esaki despues di 6 aña a bin logra den e kampeonato aki na Suramérika.

Miembro di gerensia di MCB, señor Michael de Sola a dirigí palabranan di elogio na kada hungadó individualmente i a felisitá e selekshon kompleto pa nan prestashon. Tambe señor De Sola a trese dilanti ku e hóbennan di CSB ta un ehèmpel pa nos komunidat. E deporte di sòftbòl ta relativamente nobo bou di hende muhé, pero ku un tremendo ‘team work’ CSB a sa di saka kara di Kòrsou den eksterior. Ta importante pa nos selebrá tur e momentunan positivo aki pa nos dushi Kòrsou.

Promé ku a finalisá e selebrashon, señor Chicu Capriles direktor di MCB a hasi entrega di un gift card na kada miembro di e selekshon di CSB.

Señor Lernnerth Angela, presidente di CSB na su turno a gradisí MCB pa su kontribushon di tantu aña i a hasi entrega di un bala firmá pa kada hungadó di e selekshon kampeon.

Ta importante pa menshoná ku señor Angela na e momentunan aki ta na Hapon pa asistí na e Kongreso Mundial di sòftbòl  pa haña mas informashon i instrukshon tokante kampeonatonan di aña 2020 pa 2022; di manera ku Kòrsou lo por sigui partisipá den torneonan internashonal.

MCB ta deseá CSB tur klase di éksito den futuro i ta enkurashá henter e tim pa sigui traha duru pa sigui engrandesé e deporte i nivel di sòftbòl na Kòrsou. CSB por sigui konta ku sostén di MCB.