Maduro & Curiel’s Bank a anunsiá for di aña pasá na tur kliente usuario di chèk personal, ku entrante 1 di yanüari 2020, Maduro & Curiel’s Bank no ta emití buki di chèk personal mas; i entrante 1 di aprel 2020, Banko lo no aseptá ni prosesá chèk personal mas. Esaki debí na desaroyonan mas inovativo i digital den e mundu finansiero.

Aktualmente tin un otro aspekto ta hunga un ròl, ku ta e desaroyo di Corona Vírùs (COVID-19) i MCB ta konsiente di e hecho ku na e momentunan aki loke ta mas importante ta pa nos klientenan por hasi uso di e diferente posibilidatnan pa paga i kobra.

Pa e motibu akí, Maduro & Curiel’s Bank a tuma e desishon pa alargá e periodo den kual MCB ta aseptá i prosesá chèk personal. Klientenan tin oportunidat pa depositá i kèsh chèk personal te djabièrnè 29 di mei 2020.

Pues entrante djaluna 1 di yüni 2020, MCB lo no aseptá ni tampoko prosesá chèk personal mas. Ku e kambio aki nos ta tuma e pasonan pa un sistema liber di chèk, manera ya ta e kaso den nos region i na hopi país rònt mundu.

Tuma bon nota ku klientenan ku ta deseá restitushon pa chèk òf buki di chèk no usá, por debolbé nan na kualke brènch promé ku djabièrnè 29 di mei 2020.

Durante e periodo di transishon akí pa eliminá uso i aseptashon di chèk personal, nos ta enkurashá tur kliente pa hasi uso di nos plataforma di MCB Online Banking i MCB Mobile Banking, kual ta rápido, seif, konfiabel i kumbiniente.

Pa asistensia personal tokante uso di MCB Online Banking, por fabor tuma kontakto ku nos na 466 1111 òf info@mcb-bank.com; tambe klientenan por apliká online pa e servisio di MCB Online Banking via e aplikashon riba nos wèpsait na

www.mcb-bank.com/online-banking.

MCB a inisiá tambe e trayekto pa deskontinuá chèk komersial den 2021 i lo informá tur kliente di esaki na su debido tempu.