WILLEMSTAD –  Djaluna 17 di òktober Maduro & Curiel’s Bank a kontinuá ku nan aktividat pa yama nan klientenan ku ta bishitá nan brènchnan danki pa nan sosten, lealtat i konfiansa. E di dies aktividat na brènch den kuadro di MCB su rumbo pa 100 a tuma lugá na brènch di Montaña. Parti paden di e brènch Bo Banko Amigu a sorpresá klientenan ku un presentashon di baile di salsa di Chuki’s Dance Acadamy i un presentashon di Edion Booy (Komediante). Tema di e selebrashon tabata “Ban pariba estilo Kubano”.Tur kliente ku tabata presente a haña oportunidat pa gana un Kompa Leon Gift Card. Na total Bo Banko Amigu a regalá 5 Kompa Leon Gift Card na balor di

NAf. 100,– kada un. Tambe MCB a sorpresá tur kliente ku a bishitá brènch di Montaña ku un dushi trit i un bunita rekuerdo. Mas atardi entre 6:00 p.m. i 7:00 p.m., riba parkeerplaats di e supermerkado bisiña, Alivio, tabatin presentashon di koleganan di Montaña brènch, muchanan di Kolegio San Dominico, MCB Centennial Band i pa kuliminá, un tremendo presentashon di Cuban Groove ku doña Mafalda Miguel komo kantante. Tur presente a gosa un bòl i naturalmente tabatin algu pa sisti e stoma i baha set. Komo muestra di apresio i sosten na e área di brènch di Montaña, koleganan i Branch Manager di Montaña brènch huntu ku miembronan di e tim di maneho di Bo Banko Amigu a hasi entrega di un chèk na balor di NAf. 5.000,– na Kolegio San Dominico. Ku e donashon aki, MCB ta kontribuí pa maestronan i alumnonan di Kolegio San Dominico por konkretisá algun di e bunita proyektonan ku nan tin planiá p’e skol.

Keda pendiente pasó e luna aki tambe, dia 16 di novèmber, Bo Banko Amigu lo sorpresá klientenan na un di su brènchnan.