WILLEMSTAD –  Djabièrne 15 di yüli Maduro & Curiel’s Bank a kontinuá ku nan aktividatnan pa yama nan klientenan ku ta bishitá nan brènchnan danki pa nan sosten, lealtat i konfiansa. E di shete aktividat na brènchnan den kuadro di MCB su rumbo pa 100 a tuma lugá na brènch di Colon. Parti paden di e brènch Bo Banko Amigu a sorpresá klientenan ku presentashon di rumannan Gomez kendenan a entretené klientenan ku algun kansion. Tur kliente ku tabata presente a haña e oportunidat pa gana un Kompa Leon Gift Card. Na total Bo Banko Amigu a regalá 5 Kompa Leon Gift Card na balor di NAf. 100,– kada uno. Tambe MCB a sorpresá tur kliente ku a bishitá brènch di Colon ku un dushi trit i un bunita rekuerdo. Mas atardi entre 5.30 p.m. i 6.30 p.m., nèt pegá ku pòmp di gasolin di Curoil riba tereno di Colon, tabatin presentashon di koleganan di Colon brènch, muchanan di Mgr. Nieuwindt College, MCB Centennial Band i Nando Brown. Tur presente a gosa un bòl i naturalmente tabatin algu pa sisti e stoma i baha e set. Komo muestra di apresio i sosten na e área di brènch di Colon, koleganan i Branch Manager di Colon brènch huntu ku miembronan di e tim di maneho di Bo Banko Amigu a hasi entrega di un chèk na balor di NAf. 5.000,– na Mgr. Nieuwindt College. Ku e donashon aki, MCB ta kontribuí pa maestronan i alumnonan di Mgr. Nieuwindt College por konkretisá algun di e bunita proyektonan ku nan tin planiá p’e skol.

Keda pendiente pasó e luna aki tambe, dia 16 di ougùstùs Bo Banko Amigu lo bolbe sorpresá klientenan na un di su brènchnan.