WILLEMSTAD- Maduro & Curiel’s Bank N.V. pa años ta demonstrá di ta é Banko pa empresarionan chikí, mediano i tambe esnan mas grandi. Bo Banko Amigu su departamentu di krédito komersial i di Empresa Chikí (Small Business Unit) ta suprayá ku e relashon ku tur su klientenan ta sumamente importante sin ta importá nan nashonalidat. Mirando e influensia grandi di empresarionan Chines den nos komunidat i tambe e retonan ku e empresarionan aki a bin ta eksperensiá ultimamente, Bo Banko Amigu a organisá un evento spesial pa nan. En konekshon ku kambio di aña Chines dia 31 di yanüari 2014, Maduro & Curiel’s Bank N.V a organisá un selebrason pa e okashon spesial aki na Holiday Beach Hotel. Durante e selebrashon aki klientenan di Maduro & Curiel’s Bank ku nashonalidat Chines i tambe Kònsul General di China, a wòrdu invitá huntu ku nan famia pa habri aña nobo den un ambiente festivo. Tradishon ta indiká ku aña 2014 ta “e aña di kabai” ku segun predikashonnan ta favoresé finansas i ta trese hopi ganashi. P’esei MCB huntu ku nos komunidat Chines a selebrá esaki en grande ku tremendo show di baile tradishonal di China, show di leon, karaoke i rifananan atraktivo. Tambe tabatin un skina di entretenimentu spesial pa e muchanan ku a disfrutá di bouncer, suikerspin i popcorn. Departamentu di Tarheta (BankCard Services) tabata presente i a duna informashon tokante e produkto nobo nobo di nos Banko Amigu, spesialmente pa empresanan chikí, pero en general pa tur negoshi ku ta traha/risibí produkto di distribuidornan lokal. Esaki ta un tarheta B2B (Business to Business), un tarheta di pago elektróniko, ku ta yuda empresarionan eliminá plaka kèsh na kompra di merkansia. Esaki pues ta trese mas seguridat pa e agensianan distribuidó i nan empleadonan. Durante e selebrashon aki tambe Maduro & Curiel’s Bank a hasi un donashon di NAf. 5.000,- na e club Chines kual ta e organishon enkargá ku inkorporashon di un skol spesial pa hobennan Chines. E selebrashon a wòrdu klousurá ku un tremendo show di vürwerk. E aktividat aki tabata sostené pa e komunidat Chines kompletu i sigur a reforsá e relashon estrecho entre Maduro & Curiel’s Bank i e komunidat aki. Maduro & Curiel’s Bank ta sigui hasi su máksimo esfuerso pa tene tur su klientenan satisfecho.