WILLEMSTAD – Maduro & Curiel’s Bank N.V. huntu ku InnovatieCentrum Curaçao i ADECK a uni forsa pa asina por sigui kontribuí na enkurashá e espíritu empresarial i inovativo den nos komunidat.  E biaha aki esaki lo tuma lugá den forma di un kompetensia di e mihó inovashon di sea produkto, servisio òf proseso empresarial ku lo keda  transmití na televishon. E programa ta karga e título di I Factor TV, (“I” di “innovation/inovashon”). I Factor ta un programa di 6 episodio ku lo wòrdu transmití na Telecuraçao entrante Novèmber 2013. Meta di e programa ta pa informá komunidat di e importansia di inovashon, duna sugerensia kon pa inová i na e mesun momentu e programa lo inkluí un kompetensia kaminda partisipantenan ku ideanan komersial inovativo por kompetí kontra di otro. Di e manera aki MCB su departamentu di Empresa Chikí ta kontribuí na duna informashon i alabes ta enkurashá invashon bou di (futuro) empresarionan.

Ken por registrá:

Tur persona ku un edat mínimo di 18 aña i tambe kompanianan ku tin un produkto, proseso òf servisio inovativo por partisipá na I Factor TV. E programa lo ta unu hopi eksitante kaminda públiko tambe lo por influensiá e puntuashon, entre otro dor di vota via Facebook. E kantidat di partisipante na I Factor ta limitá, p’esei ta pidi tur ku ta interesá pa inskribí mas lihé posibel i no mas tardá ku 30 di ougùstùs 2013, p’asina por kuminsá ku e preparashonnan pa grabashon.

Premio pa ganadó di I Factor:

E ganador apsoluto di I Factor lo risibí un suma di NAf. 7.500,-; un trofeo ku e título di Innovatieprijs 2013;  i finansiamentu garantisá di Maduro & Curiel’s Bank N.V. pa un máksimo di NAf. 10,000.= .

Kiko ta inovashon?

Pa e kompetensia aki, inovashon ta wòrdu definí komo kreashon di un produkto, servisio òf proseso nobo òf introdukshon di un kambio den produkto, servisio òf proseso ku e meta pa hasi esakinan mas efisiente. E partisipante no nesesariamente mester tin un kompania ku ta registrá na “Kamer van Koophandel” pero e produkto, proseso òf servisio inovativo mester ta algu ku potensial i karakter komersial. E inovashon mester tin resultado positivo i duradero pa un organisashon òf kompania spesífiko òf pa ekonomia di Kòrsou. E persona ku inskribí komo partisipante mester hasi un presentashon dilanti un kuerpo di hurado durante un “casting” ku lo tuma lugá den sèptèmber 2013. Na e “casting” e partisipante ta haña un máksimo di 3 minüt pa presentá su inovashon dilanti e kuerpo di hurado i despues e lo risibí un máksimo di 2 minüt pa kontestá eventual preguntanan di e hurado. Meta di e presentashon ta pa konvensé e huradonan ku bo idea ta ésun mas inovativo. E presentashon lo wòrdu evaluá riba e siguiente kriterionan: originalidat, impakto di e inovashon, kreatividat di e presentashon, faktor realisabel pa merkado i popularidat. For di tur partisipante ku a duna un presentashon durante e “casting”, e hurado lo selekshoná un total di 8 finalista ku lo sigui pa e segundo etapa di e programa kaminda lo elaborá mas riba nan inovashon ku tambe lo wòrdu transmití na televishon.

Seshon informativo i registrashon:

Tin un seshon informativo pa tur persona ku a registrá pa asina por duna mas splikashon i detaye tokante e programa I Factor. Partisipantenan por inskribí i haña e reglanan di partisipashon i formulario di registrashon via sbu@mcb-bank.com òf na number di telefon di MCB Small Business Unit 466-1217 òf por e-mail shooi@icc.cw òf tuma kontakto ku InnovatieCentrum Curaçao na number di telefon 737-1360. Tambe por chèk e página di facebook “I Factor TV” pa mas informashon. Maduro & Curiel’s Bank N.V. ta keda E Banko pa empresa chikí!