WILLEMSTAD – Djamars dia 22 di òktober di un manera festivo i ku 4 mucha komo testigu señor Chicu Capriles, presidente direktor di Maduro & Curiel’s Bank i señor Feco Gomes presidente di Instituto pa Formashon Musikal a firma un kontrato di koperashon kaminda Bo Banko Amigu ta kontribuí ku un montante di 150 mil florin di kual 100 mil florin lo keda aloká pa duna lès di músika na muchanan di Kòrsou i 50 mil florin pa kompra di instrumentonan musikal pa e muchanan por práktika riba dje. Ku e kontribushon balioso aki di MCB, mas o ménos 1000 mucha di diferente bario, internat i GOG por haña lès di músika grátis despues di ora di skol. Instituto pa Formashon Musikal ya kaba tin 9 aña ta traha na formashon musikal di nos muchanan ku resultadonan hopi positivo. Esaki nos por eksperensiá ku Junior All Star Orchestra ku delaster tempu a bin ta demostrá kon bon e muchanan ta prepará. Junior All Star Orchestra no ta un grupo musikal deskonosí pa MCB, ya ku Lito, É Amiguito Spardó di MCB, ya pa basta tempu ta kontribuí ku e orkesta su unifòrm. Presidente direktor di Maduro & Curiel’s Bank, señor Chicu Capriles, ku hopi plaser a bisa ku MCB ta rekonosé e balor importante di aktividatnan sosial, edukativo i deportivo pa mucha despues di skol. No solamente e ta amplia nan konosementu pero e ta uni i disipliná e muchanan den un área ku nan por ekspresá nan mes positivamente. Muchanan di bario nan  manera Suffisant, Wishi/Marchena, Bonam, Tera Kòrá, Barber, Soto i hopi mas ta haña e oportunidat pa siña toka un instrumento musikal, kanta òf baila. Ku esaki MCB ta garantisá ku Kòrsou por sigui produsí artistanan musikal grandi. Di banda di Instituto pa Formashon Musikal, señor Feco Gomes presidente di direktiva, a ekspresá su alegria i gratitut na MCB, pasó ta danki na kompanianan manera MCB músika por sigui biba bou di nos muchanan. Maduro & Curiel’s Bank alabes ta rekonosé e esfuersonan balioso di tur e dosentenan di tur e diferente disiplinanan musikal ku ta duna e muchanan lès. Tambe di e mayornan di tur e muchanan ku ta stimulá nan yunan pa partisipá den aktividatnan positivo manera e proyekto aki di Instituto pa Formashon Musikal. Huntu ku Maduro & Curiel’s Bank, mester gradisí tambe Samenwerkende Fondsen, C.O.R.E i Gobièrnu di Kòrsou ku tambe a duna un kontribushon pa hasi e proyekto grandi aki posibel. A skohe Fatima College komo lokalidat pa hasi e koperashon entre Maduro & Curiel’s Bank i Instituto pa Formashon Musikal ofisial, asina un i tur por haña un bista di aserka kon e lèsnan ta keda duná despues di skol i e kantidat di mucha ku ta partisipá. Despues ku a firma e kontrato Junior All Star Orchestra a duna un tremendo presentashon.