WILLEMSTAD – Djabièrnè atardi 2 di desèmber e seremonia di ‘ground breaking’ a tuma lugá pa konstrukshon di e hotèl i apartamentu Majestic na e sitio kaminda ántes tabatin e lugá públiko pa stashoná outo na Marichi. Marichi Vastgoed N.V., ku ta parti di Neuman Group, ta esun ku ta duna e enkargo pa e proyekto aki. Despues di palabranan di bonbiní di presidente direktor Randy Neuman, minister Charles Cooper di VVRP a hiba palabra. E tabatin e tarea pa habri e tera usando un loader. Esei ta sirbi komo señal simbóliko pa e kontratista kuminsá hasi e preparashonnan pa asina ku aña bòltu realmente e inisiá e konstrukshon.

Ku e 30 añanan di eksperensia tras di lomba, Randy Neuman a marka pouta komo desaroyadó i agente di propiedat imobilario. Esei a resultá den numeroso proyekto rònt Kòrsou ku a bira realidat bou di su mando.
Kaminda den pasado tabatin Hendrik School, den e tempu benidero lo aparesé e proyekto mas nobo di Grupo Neuman den tres fase i pa kua na yüli último e pèrmit di konstrukshon a drenta. De paso, e promé plannan pa esaki ta data di 2013. ‘Majestic apartments & hotel’ ta bini den kurason di Punda kant’i awa. Komo ku stashonamentu di outo ta esensial, ta kumbiní ku e grupo aki mes ta manehá e aparkamentu Pietermaai na otro banda di kaya.

Invershon
Konstrukshon di e hotèl i apartamentu di 4 strea na Pietermaai ta rekerí un invershon total di 47 mion florin. E promé fase ta rekerí un invershon di 8 mion florin ku un banko lokal lo finansiá. Pa e siguiente dos fasenan un finansiamentu rotativo lo drenta na vigor.

Riba e tereno lo traha 10 kompleho di apartamentu. Konkretamente ta trata di 24 apartamentu ku 1 dormitorio, 3 apartamentu riba dak ku 2 dormitorio, 78 apartamentu ku 2 dormitorio, 6 espasio pa pakus, un restorant, un espasio pa resepshon i un pisina komun.

Hür ku turista

Segun Marichi Vastgoed, ta bai bende 30% di e proyekto di apartamentu i hotèl pa residensia permanente i 70% ta bende tambe meublá, pero e apartamentunan aki mester ta disponibel durante 10 luna di aña pa hür ku turista.

Den konstrukshon di e proyekto alrededor di 60 persona lo ta na trabou. Unabes ku e hotèl ta operashonal, Majestic lo duna trabou na alrededor di 50 empleado.