Willemstad, Djadumingu pasá,  a tuma lugá e terser edishon di Luna Yen den bario, e biaha aki na Jozef Civilis na Baber.  E hóbennan di Barber a sá di demostrá ku sobrá barionan tin kompetensia grandi. Durante e siman di 13 pa 19 di òktober Luna Yen tabata den e bario di Barber na unda ku un kantidat di 20 hóben a inskribí pa partisipá na e tayernan di kanto, baile i aktuashon i/o partisipá na e oudishon di Luna Yen Barber. E hóbennan a risibí nan tayernan serka Eduard Reineta (aktuashon), Rudaylison Doran (kanto) i Rouegean Cijntje (baile). E atardi tabata yená ku presentashonnan ku a laga e huradonan asombrá. Na final di e atardi tabata e hóben Giheny Jamanica ku a gana e titulo mayor na e oudishon di Barber. E hóben a destaká enormemente den aktuashon. E promé finalista a sali e grupo di aktuashon formá dor di Shasien Wolf, Azaria Plaate, Gedion Kook, Gurtson Hooi i Giheny Jamanica. E hóbennan a sá di tene e públiko den suspenso durante nan presentashon. E premio di segundo finalista a bai pa Thaynise Alvarez, kual a duna un bunita presentashon di kanto. E huradonan di e atardi tabata John Nagtegaal(aktuashon), Reuel Rogers ( baile) i Harlianne Brazil (kanto). Representantenan di Banco di Caribe. Jetha Romer i Miniovis Clara tabata tei presente pa apoyá e hóbennan di Barber. Na final di e presentashon señora Jetha Romer a hiba palabra. Ta gradisí Banco di Caribe, ENNIA, Refineria Isla, Coca Cola, Auto City, Gobièrnu di Kòrsou, Teatro Luna Blou i La Tentashon. Di 20 pa 26 di òktober próksimo Luna Yen lo ta na Kolegio Chaya Willems den Punda. Pa partisipá na e tayernan i/o oudishon por inskribí djaluna 20 na Chaya Willems. E tayernan ta kuminsá mitar di tres. Pa mas informashon tokante skema di bario i tayernan i oudishonnan bishita nos página wèp : www.lunablou.com òf nos facebook page: Teatro Luna Blou. Tambe por yama Teatro Luna Blou na 462-2209.