Willemstad, Luna Yen e show di talento mas gusta bou di hóben den kombinashon ku teater te den bo bario ta bai ranka Sali. E aña aki nos lo ta un biaha mas na diferente bario nan buskando hóbennan ku ke sigui desaroyá nan talento. Luna Yen ta un kompetensia kaminda hóbennan por demonstrá nan talento den diferente disipliná artístiko. Huntu ku Luna Yen lo tin Teater te den bo bario kaminda muchanan i hóbennan lo bai haña tayer durante un siman largu pa na final di e tayernan nan presentá loke ku nan a siña durante e siman ei aparte di esei esnan e hóbennan riba 14 aña tin e chèns pa hasi nan oudishon. E bario nan ku lo wòrdu bishita e aña aki ta Montaña, Tera Kòrá i Brievengat. Aña pasa nos tabatin e mes un konsepto i esaki tabata un éksito rotundo. E aña aki nos a kopia e mes un modèl. E proyekto aki tin tres opshon. E promé opshon ta enserá e parti di tayer so. Pues e muchanan/hóbennan ku inskribí ta risibí diferente tayer entre otro Baile, Kanto/Músika i Aktuashon. Den e opshon aki muchanan for di 6 aña bai ariba por partisipá. E di dos opshon ta enserá tayer i oudishon. Esaki ta nifiká ku durante un siman e hóbennan ku inskribí lo haña tayer den e disiplina ku nan skohe. Na final nan lo duna un presentashon ku alabes lo bira nan oudishon pa nan bai e Semi Final di Luna Yen. E opshon aki ta pa hóbennan for di 14 aña te ku 22 aña. E terser opshon ta oudishon so. E hóbennan ku inskribí pa e opshon aki no ta sigui e diferente tayernan, pero nan mester tei presente durante di e ensayo general i e oudishon. Esaki tambe ta pa hóbennan for di 14 aña te ku 22 aña. For di kada bario lo saka e finalista nan ku lo bai e Semi Final. Den e Semi Final lo saka e mihónan ku lo bai e Gran Final. E ganadónan di Luna Yen ta haña e oportunidat pa presentá na Kunstbende, Hulanda i tambe na Dutch Caribbean Youth Art Festival. Aparte di esei nan ta haña e oportunidat pa presentá na diferente kaminda aki na Kòrsou pero den region tambe. E promé siman di Luna Yen den Bario ta kuminsá dia 17 ougùstùs na Sentro di Bario Montaña for di 2or pa 5or di atardi. E lo ta henter e siman ei te dia 22 ougùstùs. E tim di Luna Yen a bishita algun skol den bisindario pa asina duna informashon, motivá e hóbennan i alabes laga nan inskribí mes ora pa ku e proyektonan aki ku ta kompletamente grátis. Nos tabatin e grato plaser di bishita Pierre Louffer i Kolegio San Dominico, tabata dos mainta masha satisfaktorio pa ku e skol pero alabes pa e tim, mirando e talentonan ku skolnan di Kòrsou tin. E muchanan/hóbennan den un tempu basta kòrtiku tabatin e oportunidat pa presentá un ratu spòntan pa nan kompañeronan di skol, dosentenan i e tim di Luna Yen. Djabièrnè, pues awe nos lo ta di bishita na Mari Stella VSBO tambe. Pa motibu di tempu nos no por a bishita mas skol pa ku e bario Montaña i bisindario pero si bo ta den e áreanan aki, ainda bo por inskribí. Djaluna awor bo tin chèns di yega serka nos na sentro di bario montaña. Keda pendiente paso nos lo ta na Tera Kòrá na fin di ougùstùs komienso di sèptèmber i na Brievengat mei mei di sèptèmber. Un danki na esnan ku ta kere fielmente den e proyektonan aki kual ta Banko di Caribe, Refineria Isla, Gobièrnu di Kòrsou, Teatro Luna Blou i La Tentashon. Si bo tambe ke forma parti i kontribuí ku proyektonan edukativo pa nos muchanan/hóbennan. Por tuma kontakto ku Teatro Luna Blou. Pa mas informashon tokante skema di bario i tayernan i oudishonnan bishita nos página web : www.lunablou.com òf nos facebook page: Teatro Luna Blou. Tambe por yama Teatro Luna Blou na 462-2209.