Willemstad, Luna Yen e show di talento mas gusta bou di hóben lo bai ranka sali djadumingu 29 di òktober ku tayer i oudishon na La Tentashon. Luna Yen ta un kompetensia kaminda hóbennan por demonstrá nan talento den diferente disipliná artístiko. Dia 29 di òktober lo tin Oudishon pa asina kuminsá buska e hóbennan ku lo por partisipá den e gran Final di Luna Yen 2017.

E dia aki nos lo tin tayer di Aktuashon di 13:00 pa 13:40, tayer di kanto di 13:40 pa 14:20 i tayer di baile di 14:20 pa 15:00. E tayer nan aki ta spesialmente pa e hóbennan ku kisas por tin un tiki miedo òf ke drecha nan téknika promé ku e oudishon kuminsá. E oudishon mes lo ta di 15:00-17:00.

E tayernan lo ta grátis pa tur hóben. Bo por partisipá den tur 3 tayer òf esun di bo preferensha. Si dado kaso bo no por asistí na e tayernan, no ta problema, bo por bin e oudishon mas lat.

Bo por partisipá individual òf den grupo di max 5 hende. Manda bo informashonan via mail na info.lunablou@gmail.com òf via Facebook na: Luna Yen, e show di talento pa hóben. Tambe por yama Zona Kultural (Teatro Luna Blou) na 462-2209.