Willemstad, Djasabra 6 di desèmber na La Tentashon a tuma lugá e Gran Final di Luna Yen 2014. Diesdos finalista a partisipá pa wak ken lo gana e titulo di Luna Yen 2014. Luna Yen su Gran Final tabata karga ku presentashon nan di baile, kanto, i aktuashon. E finalista nan ku a presentá e anochi ei tabata Giheny Jamanica (aktuashon), Daymaris Lacruz (kanto),  Gedion Kook & Christopher Damiana (aktuashon),  Chaina Dieudonne (kanto), Zaerick Martha (poesia), Melanie Angela (kanto), Melissa Chirinos, Raymick & Rayzahna Martha (baile), Grupo Ken a Mandabu? (aktuashon), Sugar Mama (rap), Grupo S.A.G (aktuashon), Christy Wilson (kanto), i Dyogenis “Dio” Semerel (baile). Durante e anochi ei e sala di La Tentashon a keda kombertí den un stage tur afó kaminda e hoben nan por a duna nan presentashon huntu ku animashon di MC Chris Strick. Huradonan di e anochi ei tabata Tito Doran, Cesar Palacios, Grandi “Yo” Jacobs, Donovan Bennett i Shurnailis Hanson. Mester menshoná ku e huradonan tabata tin un tarea sumamente difísil na momentu ku nan mester a skohe e ganadó, e promé i di dos finalista. E titulo mayor a bai pa e hoben Zaerick Martha ku a deklamá un tremendo poesia. E hoben a interpretá bida di un persona siegu i via di un poesia a buta sala kompletu para ketu i realisá kon bunita bida ta, i kon tiki tempu nos ta tuma pa apresiá tur loke ta rondoná nos. Na di dos lugá a Sali e grupo di aktuashon SAG. Grupo SAG tabata konsistí di e hoben nan Shaeedy Aniceta, Michelle Kunst, Andres Herrera i Daymaris La Cruz. E hoben nan aki a hiba públiko den un manikomio i laga nan sera konosí ku e 4 habitantenan ku a sukumbí na nan problemanan. E di tres lugá a bai  pa e hoben Dyogenis “Dio” Semerel, kual a duna un presentashon di baile. Pa medio di e arte di baile e hoben a interpretá historia di un hoben ku ta pèrdè su mama den un aksidente. E produktornan di Luna Yen ta sumamente impreshoná ku e kantidat di partisipantenan ku tabata tin e aña aki i ku e talento ku kada un di e muchanan ku a partisipá den Luna Yen den Bario tin. Pa tur esnan ku no por a partisipá e aña aki i na tur esnan ku ke bolbe partisipá nos ta spera boso den 2015, pa e siguiente edishon di Luna Yen. Luna Yen kier a yama danki na tur e spònsernan ku a hasi e edishon di Luna Yen 2014 posibel. Esakinan ta Banco di Caribe, Ennia, Refineria Isla, Coca Cola, Auto City i Gobièrnu di Kòrsou.