Pasashinan ta bayendo na mita prijs! Bis’e cuanto bo ta stim’e, afo bo ta hib’e

ORANJESTAD, Aruba – 17 di februari 2016: Siendo un di e celebracionnan cu semper ta bay compaña cu regalo, Aruba Airlines e aña aki a lansa un campaña specialmente pa Valentine’s Day. Pa por promove mas biahamento, a duna 50% di descuento riba pasashinan, haciendo cu parehanan lo por biaha hunto pero pagando pa un solo pasashi. Hopi hende a probecha di e descuento aki y como tal, hopi pareha e aña aki a ricibi un pasashi regalo hunto cu nan bouquet di flor riba dia di amor y amistad.

Cu e promocion aki Aruba Airlines ta permiti biaheronan pa biaha entre 12 pa 29 di februari 2016 pa cualkier di su destinacionnan, cu ta varia entre Miami, Panama, Corsou, Santo Domingo, Maracaibo y Valencia. E campaña a inicia diabierna ultimo dia 12 di februari y lo ta valido te cu diabierna awo dia 19 di februari 2016. Pa por haya e tarifanan special aki, mester cumpra e pasashinan sea na e oficina principal di Aruba Airlines situa na Cumana of na nan oficina di benta na Aeropuerto. Tene cuenta cu tarifanan no ta inclui airport tax.

A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela, Corsou y Santo Domingo. Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Nan tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.