ORANJESTAD (AAN): Loco Lobo Productions y SD Concerts ta anuncia oficialmente awe e 4 banda nan cu lo deleita tur esnan cu lo ta presente pa e concierto mas anticipa aki na Aruba cu ta “Romeo Santos Live in Aruba” dia 26 di Juli, 2014. E 4 bandanan ta bandanan cu amante di bon musica y cu ta gusta ambiente ta bon conoci cu nan. Nos por menciona cu N’Fuzion lo tin e honor pa habri e anochi y despues lo sigui cu e D’Licious cu ta bon conoci pa toca un variacion musical enorme. Ora cu caba, Tsunami lo tin e honor pa deleita e publico cu nan cancion 12 Rosas cu ta cosechando hopi exito aki na Aruba. Despues e anochi lo continua na unda cu e New Kids on the block cu ta Buleria, lo tin e honor pa cuminsa habri caminda pa E Rey di Bachata Romeo Santos. Lo ta bon pa nos informa tur esnan cu ta preparando pa atende e concierto, cu porta nan lo habri 6:30 di atardi, y e prome banda lo ta riba scenario pa 7’or di anochi. Lo ta bon pa avisa tur esnan cu lo para den e seccion di entrada general, cu nan por cana cu nan klap stoel si acaso cu nan ta desea pa sinta. Un recordatorio pa esnan cu no a cumpra na carchi entrada of Mesa di VIP, cu ainda e oportunidad tey pa pasa na e Ticket Outlet Center cu ta situa entre Hamaka y Roadside Café y ta habri di Dialuna pa Diabierna entre 3’or di atardi te cu 10’or di anochi.