Tsunami lo toca cantica di mucha so den paradanan Dianan 15 y 16 di januari por decora t-shirt den showroom di Garage Cordia

ORANJESTAD, Aruba – 10 di januari 2016: Cu sosten di Garage Cordia, Malta Balashi Tsunami y Dare to Dream Foundation, un soño pa mira un grupo di mucha completamente dedica na e talento y creatividad di nos muchanan ta bira un realidad. Pa solamente 35 florin, muchanan ta haya nan t-shirt, nan headpiece y un vest y tin nan participacion garantisa pa e parada di Noord (23 di januari),  San Nicolas (24 di januari) y Oranjestad (31 di januari).

Durante di e paradanan lo toca y canta solamente canticanan di mucha. Little Dreamers ta haci un apelacion na musiconan hoben, muchanan cu ta bay les di musica y cantantenan hoben pa tuma contacto cu e grupo pa uni cu e musiconan di Tsunami riba trailer pa un experiencia unico.

Como e sponsor principal di e grupo, Garage Cordia a pone un balie dedica na Little Dreamers pa mayornan pasa inscribi na yiunan den e showroom na Garage Cordia riba diabierna 15 y diasabra 16 di januari.

Meta principal di e lider di grupo Edseline Figaroa di Little Dreamers, ta pa envolve muchanan mas den Carnaval, for di e decoracion di nan paña y e skirbimento di e canticanan, te na e presentacion di e canticanan, incluyendo musiconan y cantante. E grupo ta wordo compaña pa Tsunami y e hobennan cu ta participa na e festival di Calypso y Roadmarch Infantil y Hubenil.

Garage Cordia ta uni na e grupo cu e campaña Toyota Dream Car Art Contest, cual ta un campaña mundial. A lansa e campaña aki aña pasa y ya a ricibi diferente registracion.

Gerente di Mercadeo di Garage Cordia, Vanessa Hollander a anuncia cu e campaña aki ta vigente ainda. Toyota ta invita tur mucha pa entrega un pintura di e auto di nan soño; na cada dealership di Toyota participante rond mundo lo scoge un ganado y e pintura ganado di cada dealership ta wordo manda Hapon, unda cu Toyota lo scoge un diseño ganado.

E idea tras di e campaña aki ta pa encurasha muchanan y hobennan rond mundo pa soña y expresa nan soñonan pa futuro.

Garage Cordia ta invita tambe tur mucha cu registra pa e grupo Little Dreamers pa bishita e showroom riba dianan 15 y 16 di januari pa hunto decora nan t-shirt. Asina e muchanan ta haya un oportunidad pa cera conoci cu otro y traha hunto na crea nan “look” pa Carnaval 2016. Garage Cordia lo provee e materialnan pa esaki.

Edseline Figaroa ta splica cu henter e proceso pa realisa e soño di tin un grupo di Carnaval 100% dedica na muchanan a bin ariba hopi aña pasa, pero ta apenas na november durante di un reunion cu Garage Cordia pa cu su buki di mucha, el a conta di su soño. Nan a papia tocante e idea aki algun biaha y Garage Cordia a dicidi di “link” e soño aki cu e competencia “Toyota Dream Car”, cu tambe ta 100% dedica na mucha y a provee e sponsorship necesario pa realisa e soño special di un grupo 100% dedica na mucha.

E representante di Tsunami, Veroushka Croes, a haci un apelacion tambe riba e musiconan y cantantenan hoben pa tuma contacto cun’e of cu Edseline pa uni cu Tsunami pa e paradanan.

El a bisa cu Tsunami tabatin aña pasa caba un bunita experiencia cu diferente musico y cantante hoben di Muchanan Sabi y nan ta entusiasma di por expande e colaboracion aki y traha cu mas mucha pa Carnaval 62. Ta invita e musiconan hoben pa tuma contacto cu Edseline Figaroa na telefon 5938177 of cu su persona na telefon 7341416 pa realisa nan soño di toca y canta cu Tsunami pa Carnaval.

Tur mucha cu inscribi pa participa cu Little Dreamers den Carnaval automaticamente ta participa tambe na un rifa pa un trip pa bay mira e astro di baseball Arubano, Xander Bogaerts den accion na Boston. E fundacion “Dare to Dream” di Xander lo percura pa un trato VIP pa su invitado hoben y e persona cu ta compañ’e.