Dianan 22 i 23 di yüli entrega di karchi

Willemstad – Lito Film Festival e aña aki ta selebrá 10 aniversario i ta e aktividat di fakansi mas popular di Maduro & Curiel’s Bank i Lito. E tradishon di Lito aki ta duna tur aña mas ku 2000 mucha e oportunidat pa wak sine grátis na The Movies. Lito, e Amiguitu Spardó e aña aki pa di 10 biaha ta sera periodo di fakansi ku su amiguitunan na The Movies riba djaweps 30, djabièrnè 31 di yüli i djasabra 1 di ougùstùs. Lito su amiguitunan por wak e pelíkulanan mas popular di momento ku ta Minions, Inside Out, Apenstreken i Terminator Genisys. Entrega di karchi pa Lito Film Festival ta tuma lugá solamente riba djarason dia 22 i djaweps dia 23 di yüli na MCB su brènchnan na Saliña, Barber, Montaña, Punda, Sta. Maria, Otrobanda i Rooi Catootje. Karchi ta grátis i mester presentá ku un buki di Lito ku ta aktivo di por lo menos 3 luna bieu. Buska bo karchi lihé pasobra e kantidat di karchi ta limitá i sin karchi bo no por drenta. Manera ta kustumber tin guianan di Bo Banko Amigu presente. Kada mucha ta risibí un (1) karchi, pero si ta nesesario muchanan bou di 6 aña ku mester di kompaño, por bin ku un mayor. E mayor aki tambe mester tin un karchi pa por drenta. Manera ta kustumber Lito ta regalá tur mucha ku bishitá e festival di pelíkula koi bebe i popcorn. Den tur fiesta tin bolo i na final tur mucha ta risibí un dushi cupcake. Lito tambe lo ta presente huntu ku e Minions nan. Lito ta konvensí ku hopi di su amiguitunan a pasa un dushi fakansi i a disfrutá di entre otro Fakansi ku Deporte na SDK, klinika di basketball organisá pa Spartacus i otro dushi aktividatnan. Maduro & Curiel’s Bank i Lito, e Amiguitu Spardó, ta deseá tur mucha di Kòrsou un aña eskolar nobo hopi eksitoso.