Enkonekshon ku dia mundial di e malesa di ‘Sickle cell’ dia 19 di yüni, Lisle’s Foundation a tene su rueda di prensa pa asina duna inisio na e siman di konsientisashon tokante di e malesa akí.

Presidente di fundashon, sra. Larissa Hooi-Francisca, a konta e motibu pa kua ta lanta e fundashon aki. E idea ta surgi na momento ku su yu muhe di apenas 19 aña di edat ta pèrdè e bataya kontra di e malesa aki, akonsekuensia di komplikashonnan ku e enfermedat aki ta trese ku n’e.

Lisle’s Foundation a keda fundá riba 22 di febrüari di e aña aki i tin komo un di su metanan prinsipal pa konsientisá, informá i tambe eduká nos pueblo engeneral di e malesa di ‘Sickle cell”. Tumando nota ku e malesa akí ta un tabú den nos komunidat, esaki tin komo konsekuensia ku hopi persona no tin informashon i/òf no konosé e malesa aki mes, ni tampoko sa di e gravedat ku e malesa aki ta trese ku n’e. Tambe e fundashon ta para pa duna guia i sostén na personanan ku ta sufri di e malesa enkuestion i tambe na e famianan di kada un di e’Warriors’, atraves di diferente gruponan di diskushon. Lo hasi esakinan pa medio di entre otro workshops, konferensha, i/òf via di un konsulta.

Durante di e aktividat di ayera, a pone atenshon speshal na varios di e ‘Warriors’- nan ku ta luchando ku e malesa di ‘Sickle-cell’i alabes nos a duna atenshon na un mama ku a perde su 2 yunan dor di e malesa akí. Despues tur presente por a pasa i saludá e ‘Warriors’-nan.

Lisle’s Foundation lo bai tin diferente aktividat den e luna di yüni akí kaminda lo pone atenshon na e malesa di Sickle-cell. Alabes nos lo bai tin diferente kampaña di konsientisashon. Pa mas imformashon òf si bo ta deseá di registrá pa bira un amigu di Lisle’s Foundation, por bishitá nos pagina di Facebook òf por tuma kontakto ku nos na +599 9 670-2751.