Gerrit Schotte: “E reunion aki tin e meta pa kita mi pasaporte komo suidadano for di mi i pa stroba mi di biaha?”

Willemstad – Manera tabata konosí for di siman pasá, Presidente di Parlamento sr. Mike Franco a yama un reunion djamars 16 di aprel 2013 riba petishon di e miembronan Wiels, Rosaria, Davelaar i Sulvaran ku e tópiko: “Deliberashon ku Promé Minister enkuanto komportashon di Parlamentario G. Schotte resientemente den eksterior”.
Na komienso di e reunion awe mainta koalishon den parlamento a vota pa tene e reunion aki tòg “tras di porta será” durante un Seniorenconvent. MFK a indiká ku e lo no partisipá na e reunion aki. Lider di Frakshon pa MFK sr. Gerrit Schotte a hasi uso di su derecho pa hasi un vraagpunt i a puntra si e reunion aki tin e meta pa kita su pasaporte komo suidadano for di dje pa asina stroba e komo persona pa por biaha.
Ora e kuater lidernan di frakshon den koalishon a ripará ku e reunion aki lo bai kaba na aros i koko, nan a pidi Presidente di parlamento sr. Mike Franco diripiente pa agregá un punto èkstra riba agènda: “Deliberashon ku Promé Minister riba mapanan di petroli”. Promé Minister sr. Daniel Hodge a indiká ku e no a bin prepará pa e tema aki. Apesar di esaki koalishon a vota pro pa e punto di agènda di mapanan di petroli wòrdu tratá tòg. Esaki tabata e momentu ku MFK den su totalidat a disidí ku nan no ta forma parti di e reunion ridikules aki.
Atrobe a sali na kla ku e tipo di atakenan aki kontra di sr. Gerrit Schotte ta pa forma un “smokescreen” i pa tapa tur e medidanan kontra di e pueblo ku e gobièrnu aki, sostené pa e kuater lidernan di frakshon den koalishon a bini kuné.
Djabièrnè awor Parlamento lo bai trata e lèi di 9% OB. Un otro medida MAS atrobe ku lo bai tin un efekto negativo no solamente riba e hòmber chikí, pero tambe den e mundu di komèrsio aki na Kòrsou.