Aktualmente èks Presidente di Colombia sr. César Gaviria Trujillo ta di bishita na Kòrsou pa un reunion ofisial ku Promé Minster sr. Daniel Hodge.
Despues di e reunion ku sr. Daniel Hodge, sr. Presidente César Gaviria Trujillo tabata tin un almuerso privá ku lider polítiko di MFK sr. Gerrit Schotte, pa papia riba diferente temanan di interes, ku tin un efekto positivo riba e kosto di bida i kosto di hasi negoshi pa pais Kòrsou i ku por tin tambe un impulsa den nos ekonomia.
Durante e periodo 1990 pa 1994, Sr. César Trujillo a okupá e posishon di Presidente di Colombia. Aktualmente e ta Presidente di un organisashon na Colombia ku ta rafiná Gas Natural i bende esaki riba merkado komo Compressed Natural Gas (CNG).
Un di e highlight nan durante e reunion, ku a dura kasi tres ora, tabata un presentashon di e Compressed Natural Gas ku e tim di sr. César Trujillo a duna na sr. Gerrit Schotte, ku ta un base pa produkshon di koriente i awa limpi i ku ta mas barata ku Heavy Fuels (DIESEL). Gerrit Schotte ta konosí di ta un simpatisadó grandi di Energia Limpi i Duradero.
Un otro tópiko di importansia ku tambe a wòrdu diskutí awe tabata esun di seguridat den un pais. Colombia ta konosí pa un di e paisnan den mundu mas mihó prepará kontra di kriminalidat i anti-terorismo. E kriminalidat organisá ku Colombia tabata konosé den añanan ’80 a bin kulminá bou di mando di Sr. César Gaviria Trujillo ku den añanan ’90 durante su mandato a logra ku Policía Nacional de Colombia pa organisá un redada riba Pablo Escobar ku riba 2 di desèmber 1993 esaki a resultá den eliminashon di e baron di droga mas grandi den historia. Esaki a prepará Colombia durante e último 30 añanan siguí, pa awe ta un pais bon prepará kon pa logra mantené su seguridat nashonal. Awe Colombia ta un pais ku ta yuda ku lucha kontra narkotráfiko, anti-terorismo i inteligensia na paisnan manera Afrika, Mexico i vários otro paisnan den Latino Amérika.
E kòmbersashon riba e tema di seguridat entre sr. Gerrit Schotte i Presidente César Gaviria Trujillo tabata den kuadro di e resien akontesimentu na Kòrsou.