Korsou, Yüni 2019 – Igualdat Kòrsou ta kontentu ku e dos parlamentarionan Giselle Mac William i Stephen Walroud a entregá e Proyekto di Lei di Adaptashon di Matrimonio Sivil na Staten, djaluna dia 3 di yüni último. Ta trata di e Proyekto di lei trahá pa huristanan di Igualdat Kòrsou ku a keda presentá na Sra Mac William na Curacao Pride Walk na Oktober 2018, ku sostén dje organisashonnan FOKO i Curacao Gay Pro. E proyekto di lei ta habrí kaminda pa Igualdat Matrimonial pa tur pareha adulto na Kòrsou ku ke kasa.

Dia Staten aseptá e lei Kòrsou lo kumplí ku e veredikto di Korte Oropéo di Derechi Humano di 2015 ku ta eksigí pa paisnan asosiá na e Korte perkurá ku parehanan tin e mesun derechi i debernan sin importá nan orientashon. Anto ku esei Kòrsou lo a hasi un paso grandi riba kaminda pa kombatí homofobia i diskriminashon di hende ku un orientashon no-heteroseksual, ku ta bai kontra di Areglo di Estado di Kòrsou, Konstitushon di Reino i varios tratado na kua Kòrsou ta partido.

Igualdat Kòrsou ta enfatisá ku e lei no ta toka matrimonio religioso ni e matrimonio tradishonal di parehanan ya kasá na Kranshi, sino ku e ta habri e oportunidat na parehanan dje mesun sekso, pa gosa di e derechinan i kumplí ku debernan di matrimonio sivil (no-religioso). Esei ta kuadra tambe ku e prinsipio di separashon di religion i estado, ku ta base di e konstitushon, leinan i sistema demokrátiko di Kòrsou. Trato igual di tur yu’i Kòrsou pa lei, ta un dje prinsipionan sagrado di nos demokrasia.

Igualdat Korsou ta elogiá e kurashi i posishon prinsipiá riba e tópiko aki dje parlamentarionan en kuestion, i ta konfia ku mayoria di nan koleganan lo sigui nan ehèmpel. Ku esei Kòrsou lo djòin e grupo kresiente di paisnan moderno rònt mundu ku ke kaba ku tur forma di diskriminashon inhustu, di kua homofobia ta un djesnan mas tenas, huntu ku rasismo i seksismo.