Loke desde un principio a keda sospecha como un ‘joke’ di 1 April, a keda confirma como un realidad. Despues di mas cu 3 aña for di aire, Larissa Bermudez a confirma riba rednan social cu e ta bolbe radio bek y uni su mes na e ekipo di Heart Radio 106.7 FM. cu su prome programacion en bibo dia 3 di April.
E luna aki Larissa Bermudez ta estrena su propio progama yama AM. Link Up, cu lo ta den aire di Dialuna pa Diabierna for di 10’or di mainta te cu 12’or di merdia. E locutora y personahe di radio a yama e ‘comeback’ aki como un ‘full circle moment’. “E porta semper a keda habri pa radio y mi tabata sa cu si mi bolbe bek un dia, lo ta na e momento correcto, bou circunstancianan correcto y cu e hendenan correcto. Mi ta hopi contento cu esaki a presenta!”, asina Larissa Bermudez a expresa.
Den transcurso di ultimo tempo por a nota varios cambio tumando luga na Heart Radio y for di October di 2022 ya caba e radio emisora a cuminsa tuma un direccion nobo. Cu introduccion di e ‘Variety Show’ di mainta, ya caba oyentenan a cuminsa experiencia un aire fresco di berdad y un sentido di humor unico den mundo di radio na Aruba.
E duo di mainta cu ta consisiti di Ephrayim Odor y Beach Lama entre varios otro di nan personahe nan, awor lo comparti e frecuencia di 106.7 FM. hunto cu Larissa Bermudez cu ta continua cu AM. Link Up cuminsando pa 10’or di mainta.
Pa 6 aña largo oyentenan a scucha y stima Larissa como parti di “The Morning Show”, kende na 2019 a bandona e programa y emisora aki. Pues, den transcurso di añanan e fanaticonan y oyentenan no a stop di expresa di a haya falta di Larissa na radio. Segun Larissa “tur cos bon, ta tuma su tempo” y porfin e momento a yega pa complace su oyentenan bek y sigui comparti su dia mas di serca cu nan.
Larissa Bermudez y henter e ekipo di Heart Radio 106.7 FM. ta extende un invitacion personal na tur fiel oyente pa ‘link up’ hunto cu Larissa mainta pa 10’or y sintonisa su programa ‘AM. Link Up’ dia Dialuna pa Diabierna na Heart Radio 106.7 FM. Pa esunnan cu kier sigui e show en bibo por haci esaki tambe via live streaming na www.heartradio.com como tambe www.larissabermudez.com.