WILLEMSTAD – Mei 2020 – Resientemente Minister di Desaroyo Ekonómiko sra. Giselle Mc William huntu ku Minister di Tráfiko, Transporte i Planifikashon Urbano sra. Zita Jesus-Leito i Minister di Salubridat Públiko, Medio Ambiente i Naturalesa sra. Suzy Camelia- Römer a duna inisio di e promé paso pa ehekushon di e “Quick Win Plan” pa desaroyo di e área di Zakito. E promé paso aki a tuma lugá di forma simbóliko ku lansamentu di un mural riba e muraya di Aqualectra na entrada di Koredor. E artista enkargá ku pintamentu di e mural ta sr. Sander van Beusekom di BLEND Creative Imaging. E “Quick Win Plan” ta un di e puntonan di akshon di e vishon pa desaroyo di e área di Zakito kual a keda akordá na desèmber di aña 2018 dor di Konseho di Minister. Na inisio di e aña aki, Gobièrnu di Kòrsou i Ofisina di Turismo di Kòrsou (CTB) a firma un akuerdo pa ehekushon di e “Quick Win Plan”.

E “Quick Win Plan” pa desaroyo di e área di Zakito ta enserá ku lo hasi diferente mehorashon chikitu ku ta hisa balor di e área, hasié mas atraktivo pa nos komunidat por hasi uso di dje lokual lo yuda enkurashá e aspekto di ‘wellness’ bou di komunidat. Na mes momentu e mehorashonnan lo sirbi pa generá interes di posibel invershonistanan. Entre otro lo hasi limpiesa profundo, pone mas iluminashon, drecha un playa na Koredor i mehorashon di fasilidatnan rekreativo.