Willemstad – Landsloterij ta anunsiá un adaptashon den su skema di sorteo pa e periodo benidero. E kambio den e skema di sorteo aki ta pa fasilitá i akomodá tantu Landsloterij su rebendedónan i kumpradónan di brièchi durante e fase nobo di COVID-19 ku Kòrsou pero tambe Aruba, Boneiru i e islanan ariba a drenta aden. En konekshon ku desaroyonan aki i e reglanan stipulá di distansiamentu sosial pa Gobièrnu di Kòrsou. Landsloterij a tuma e desishon eliminá e siguiente sorteo i ekstendé e periodo di benta pa e sorteo mionario di òktober.

E sorteo kanselá di 17 di sèptèmber próksimo, sorteo 2015, lo tabata un sorteo di Ang. 200.000. E siguiente sorteo, sorteo 2016 lo tuma lugá dia 8 di òktober 2020. Esaki lo bai ta un sorteo mionario.  Entrante djaluna 7 di sèptèmber próksimo e brièchinan mionario lo riba merkado serka nos rebendedónan tantu na Kòrsou, Bonaire, Aruba  i isla ariba.

Distansia sosial

Mientrastantu, nos ta sigui suprayá pa un i tur ehersé distansiamentu sosial, i mantené nos mes na reglanan di higiena. Si bo sinti síntoma di tosamentu, tin temperatura haltu òf tin problema pa hala rosea, keda kas i no bai bende òf kumpra brièchi. Evitá aglomerashon di hende, mantené distansia sosial di 2 M i kòrda laba man frekuente ku habon òf ku hand sanitizer.

Benta na rebendedó,

Nos ta sigui enkurashá tur rebendedó na Kòrsou pa usa e sistemanan di kompra di brièchi alternativo, esta hasi bo pedido adelantá via di telefòn òf WhatsApp  i warda e konfirmashon  ku bo por buska bo brièchinan segun sita i asina evitá aglomerashon na Landsloterij òf hasi uso di nos sistema di delivery.  Pa motibunan fuera di nos alkanse e benta di e brièchi mionario na rebendedó ta kuminsá riba tur isla entrante djaluna 7 di sèptèmber i no djaweps 3 di sèptèmber manera kustumber. Tuma nota di e kambio aki.

Pa pregunta òf mas informashon bishitá nos página di Facebook of sigui nos riba Instagram.