‘Mi ta yu di mi mama ku mi tata, no Antillano’ Ora bo sali Kòrsou bo mester sa ku aki na Hulanda bo no ta yu di Bubu ku Chichi mas, si no un Antillano mas. Antillano no dirèkt ta wòrdu konsiderá e miho imigrante na Hulanda. Promé ku abo i ami a bin biba akinan, ya nos hendenan a marka un stèmpel ku lamentablemente no ta esun di mas bunita. Hopi eksperiensia di hóbennan bibando akinan mi a tende i mi mes tambe a pasa aden. Mi ta kuminsá pone mi punto hopi kla pa tur hende kompronde. Ami no ta un nashonalidat, mi no ta un ‘buitenlander’, manera nan ta yama nos akinan, mi ta un hende meskos ku tur otro. Mayoria Hulandes ta gusta generalisá, no tur. Nan ta pensa ku Antillanonan ta floho, ongeschoold, gusta plaka fasil i nan ta por lo general kriminalnan. Biba ku e realidat shonnan! Asina nan ta pinta nos. Pero bo ta puntra bo mes dikon nan ta pensa asina? Ami si sa! Kuantu Antillano ta bin akinan i ta keda biba manera ta na Kòrsou nan ta? Kuantu ta bin sin kumpli ku nan meta? Kuantu ta kai den tentashon, bai tras di kos di mundu? Kuantu ta bin i no ta eduká nan mes? Mi no ta bisa ku ta tur, klaro ku nò. Pero fo’i ora abo ta biba na nan lugá bo mester kumpli ku sierto regla. Meskos ku tur e Haitiano, Dominikano i Colombianonan ku ta biba na Kòrsou, ku nos tambe ta keda diskriminá, nos ta eksiguinan adaptá nan mes. Dikon nos no por hasi esei? Nos no mester ta Hulandes, pero nos mester adaptá nos manera di biba. Bo no ta na kas! Si nos kuminsá na nos mes, porta nos ta yuda drecha e imagen ku nan tin di nos. No hasi’é pa nan pero pa nos mes. Ami mes sa mira Yu’i Kòrsou ku mi ta bisa: ‘Have a heart, hasi normal’. Di otro banda mi ta bisa tambe ku ni maske kiko bo hasi bo ta keda un ‘allochtoon’ den e Hulandesnan su bista. Akinan nan plak bo karakter, aktitud, kultura ku di unda bo ta bini, na otro. Bo tin nòmber sí, pero bo ta keda “die jongen of dat meisje uit Curaçao”. Mi a bai un sollicitatiegesprek un biaha i e señora a puntrami mi nashonalidat, mi a bisa Nederlandse paso asina tin skibí riba mi passport. El a keda wakmi den mi wowo pa 30 seconde tur asombrá. Mi tabata sa ku un pregunta mas ta bai bin. E no tabata sa kon puntrami. Awèl, mi a bisé: ‘Ja, ik kom uit Curaçao’. Paso mi ta ‘gekleurd’ mi no por ta full Nederlandse. Ora di buska trabou tambe nan ta keda puntrabu di unda bo ta bini, esei ta kasi mas importante ku bo eksperiensia di trabou. Un èhèmpel di siman pasa: ‘boef uit Curaçao’. Ami nan a yamami Antillano basta biaha i tur biaha mi a bisa: “Mi no ta Antillano, mi ta Kurasoleño (Curaçaoënaar)” Pa di promé Nederlandse Antillen no ta existí mas. Di dos, di Kòrsou mi ta bini i einan mi lombrishi ta derá. Hendenan ku ta bin for di Aruba i Boneiru, bosnan tambe mester bisa ku ta di ei bo ta bin, NO di Antilla. Esei kiermèn, MI NO TA ANTILLANO! Ami ta pensa ku djis bisando esei nos ta hasi un diferensia. Mustra ku bo ta orguyoso di kaminda bo ta bini, maske kiko nan yama bo kultura. Bo no ta un nashonalidat, bo ta un persona. Pa ami ta hopi sinsero ku bo, e promé aña ku mi a biba akinan mi tabata tiné difisil. Mi a pèrdè mi identidat pa un tempu. Mi no tabata sa mas di unda mi ta bini ni ken mi ta. Esei ta pasa ora bo laga otro hende bisabu ken bo ta i bo ta keda tende malu so di bo mes hendenan. E ta bin dor di hopi kos mas tambe. Pero keremi, no laga pa bo yega na e punto ei. Ser orguyoso di unda bo ta bini, di bo pasado, bo presente i bo futuro. Abo so por disidí pa bo mes, no laga otro hasi’é pa abo. Esaki mi kier a kompartí ku bo. Ser e mihó abo ku bo por ta, Kere den bo mes, Sa unda bo kier bai. Ki bo ta pensa di e tópiko aki? Abo a pasa den tipo di kosnan asinakí? Danki <3 Ku amor,