WILLEMSTAD- 1 di novèmber 2022 – Resientemente Ofisina di Turismo di Kòrsou (CTB) a organisá un kumbre turístiko titulá: ‘Impakto di turismo riba ekonomia di Kòrsou’. E kumbre a konta ku partisipashon di ministernan, representantenan di komishon ekonómiko di Parlamento di Kòrsou i sekretarionan general di e diferente ministerionan. E meta tabata pa presentá e diferente aktividatnan ku CTB ta ehekutá tantu riba tereno di merkadeo pa asina atraé mas bishitante pa nos pais komo riba e área di desaroyo di produkto kontribuyendo di e manera ei na un mihó eksperensia di e turista ku ta skohe pa bishitá nos. Mas aleu e meta tabata pa mustra e impakto di e sektor di turismo komo pilar ekonómiko importante pa nos pais, e retonan, oportunidatnan i e ophetivonan pa aña 2023. E apertura a keda hasí pa Minister di Desaroyo Ekonómiko, sr. Ruisandro Cijntje miéntras Counterpart Director di CTB, sr. Muryad de Bruin i Business Intelligence Manager, sra. Christine Campagnard a guia e partisipantenan dor di e presentashon. E partisipantenan di nan banda a kontribuí ku preguntanan i ideanan tantu riba e área di merkadeo komo desaroyo di e produkto turístiko.

Durante di e kumbre a mustra kon CTB a kolekta, analisá i por último usa e data den ehekushon di e plannan di aña 2022 pa region di Nort Amérika, Europa, Sur Amérika i Karibe. Tambe a diskutí e tendensianan internashonal ku ta afektá e industria di biahe, e tipo di turista ku ta bishitá nos pais, for di unda nan ta bini, nan edat, e tipo di akomodashon ku nan a skohe, kon largu nan a keda, kuantu nan a gasta durante nan estadia i a hasi un komparashon ku aña 2019 esta promé ku pandemia i aña pasá. Mas aleu a kompartí e skema di airlift for di e diferente merkadonan di enfoke i a diskutí e diferente retonan i oportunidatnan pa ku airlift pa Kòrsou.

Riba tereno di desaroyo di e produkto turístiko a presentá algun akshon ku ta keda ehekutá pa alsa e eksperensia di e turista manera entre otro e programa di ouditorio i sertifikashon di establesimentunan den sektor turístiko, e proyekto Kòrsou ta dushi i limpi i e avansenan den e trabounan di konstrukshon na área di rekreashon Marie Pampoen i Zakito. Tambe a para ketu na introdukshon di turismo den skol i trainingnan pa gruponan den e industria di turismo i pa desempleadonan. Na final, CTB a gradisí e partisipantenan pa nan partisipashon i a enfatisá e bon koperashon ku e diferente ministerionan den ehekushon di e diferente akshonnan. CTB ta sigui ku e esfuersonan pa konhuntamente ku partnernan den sektor privá promové nos pais komo e destinashon turístiko number 1 den Karibe.