WILLEMSTAD – Direktiva di AMAK ta sumamente preokupá pa desaroyo kultural aki na Kòrsou  i ta spera ku e próksimo Gobièrnu  por fin lo bai duna atenshon na tur e nesesidatnan ku ta eksistí pa e diferente ramonan di kultura. Ta un echo ku durante último añanan, Gobièrnunan di turno no a pone sufisiente atenshon na kultura i ku hopi esfuerso i sakrifisio organisashonnan kultural i sosial a tene kabes riba awa. Si enbèrdat nos ke un pais kaminda hóbennan ta haña un bon formashon kultural musikal,  anto e ora ei Gobièrnunan e promé responsabel pa finansiá proyektonan ku ta traha riba formashon di nos hóbennan.

Naturalmente sektor priva tambe di su parti mester aportá, pero esaki ta tuma lugá na momentu ku Gobièrnu  tuma e inisiativa i fiha un maneho ku ta stimulá aktividatnan kultural den nos pais. AMAK ta spera di por haña un invitashon  serka e próksimo Minister di kultura, pa por dialogá i presentá un lista di prioridat di akshonnan ku mester tuma lugá na interes di un bon desaroyo kultural.

Ya kaba direktiva di AMAK ta hibando kòmbersashonnan ku entre otro representantenan di otro gruponan i di artista manera esnan den arte di baila, pintura, komedia, pa asina ei uni forsa pa kaba di elaborá un plan ku duna mas aliento na e bida artístiko aki na Kòrsou. Den kuadro di e pensamentu aki direktiva di AMAK ta spera di por haña oportunidat pa presentá su ideanan  pa un kambio positivo riba tereno kultural, na e partidonan polítiko ku na e momentunan aki ta negoshando pa forma un Gobièrnu nobo.

Si enbèrdat nos ke trata na minimalisá aktonan di kriminalidat riba nos Isla,  ta nesesario pa reserva fondonan pa por ehekutá proyektonan kultural ku ta kumpli ku e eksigensianan di bon Gobernashon. Direktiva di AMAK ta warda pa haña e yamada aki pa un reunion mas pronto posibel manera ya menshoná.