KRALENDIJK : Kuerpo polisial di Caribe Hulandes den kolaborashon ku Motorola i partner C3 a finalisá un proyekto piloto eksitoso den kual a hasi uso di komunikashon di data inteligente. E proyekto piloto a demostrá ku rapides, vishon i eksaktitut ta esensial ora ta trata di komunikashon den situashonnan krítiko. E aplikashonnan mobil i sistemanan ku a wòrdu usá, e.o e aparato mobil LEXL10, a pèrkurá pa e agentenan polisial reakshoná ku mas efisiensia i por a funshoná mas efektivo den situashonnan krítiko.

“Shete luna pasá nos a kuminsa ku un periodo di prueba i den un tempu korto ya kaba nos a mira e impakto positivo di nos kolaborashon ku C3. Dor di aktivá komunikashon di data inteligente den e proyekto piloto, manera por ehèmpel ‘mapping, whiteboard communication i push to talk’ a pèrkurá mesora pa un resultado positivo den nos mishon pa seguridat di nos komunidat i e meta di nos komo organisashon. Dor di e kolaborashon ku C3 i Motorola, i tambe dor di aktivá e servisio- i produktonan nobo aki, nos ta predesesor riba tereno di solushonnan di seguridat públiko i- medionan di komunikashon, sin ku nos mester a hasi un invershon inisial di por ehèmpel un ‘server’ òf un sentro di data. Awe nos por hasi uso, optené i kompartí data i informashon krítiko ‘real-time’ di un manera masha sigur, hasiendo uso di loke ya nos tabata tin”, esaki di akuerdo ku W. Baker, KCN Saba.

Dor di aktivá e aplikashon- i produktonan nobo a krea un manera mas efektivo pa kompartí informashon krítiko i data inteligente entre agentenan polisial i nan superiornan den nan trabou, e personal den ‘meldkamer’ i den ofisina. Awor, kuerpo polisial ta traha ku diferente ret i aparato ku ta akoplá na otro. Esaki ta duna nan e posibilidat pa traha, komuniká i kompartí informashon ‘real time’ ku otro via di aplikashonnan mobil. Hasiendo esaki, ta spar hopi tempu i por reakshoná òf akshoná mas lihé.

E pakete di servisio ku a usa den e proyekto piloto ta ofresé e.o: Un ‘push to talk’ – dor di primi un solo boton e kuerpo por komuniká ku otro riba un ret mobil di un manera sigur. Ku e aplikashon aki por hasi un konekshon ku otro pòrtofonnan ku kuerpo polisial tin aktualmente den uso. Tambe a inkluí ‘mapping’, esaki ta nifiká ku entre otro lo tin un kolaborashon mas efisiente entre e agentenan polisial. ‘Mapping’ ta duna un bon bista di agentenan ku ta den besindario di un ubikashon spesífiko òf sitio di insidente. Banda di esaki ta posibel pa komuniká ku e agentenan mesora i hasi uso di un geo-fence. ‘Messaging’ ta pèrmití unidatnan di promé ora pa manda mensahe di un manera sigur pa miembronan di kuerpo polisial ku sea teksto òf foto di persona -òf gruponan. Esaki ta sòru pa un komunikashon mas rápido i efisiente. Otro hèrmènt ku ta den e pakete ta ‘Whiteboarding’ esaki ta hasi posibel pa e agentenan traha di un manera interaktivo ku otro dor di kompartí media i informashon durante aktividatnan táktiko.

Durante di e piloto a hasi uso di e Motorola Solution LEXL10, un aparato spesialmente diseñá pa seguridat públiko. Aktualmente a aktivá 30 aparato pa kuerpo polisial den BES Caribe Hulandes trahando na Boneiru, St. Eustatius i Saba. E aparato nobo ta integrá ku e ret ya eksistente, di manera ku e trabou i interakshon den henter kuerpo polisial ta keda reinforsá i aselerá.