Willemstad –Novèmber 2015: Un delegashon di 20 persona di Kòrsou a partisipá na e STEP Latin America Conference (STEPLatAM) 2015. E konferensha a tuma lugá riba 22 i 23 di òktober 2015 den e Renaissance Hotel na Sao Paulo, Brasil. STEPLatAm Conference ta un konferensha prominente riba tereno di maneho di kapital i trust i di planifikashon di herensia. E konferensha por a konta ku diskurso di diferente oradó prominente, i un programa ku a keda diseñá spesialmente pa informá i pa envolvé esnan presenté den e topiko. Otro meta di e konferensha tabata pa sera konosí ku diferente persona ku di un of otro manera ta enbolbí den e sektor.

Kòrsou a keda bon representá na e evenemento aki. Mas ku 350 profeshonal di diferente país, manera entre otro Karibe, Latino Amerika, Estados Unidos i Oropa, a akudí na e konferensha aki. Minister demishonario di Finansas, José Jardim, tambe a forma parti di e delegashon di Kòrsou i a yama esnan presente bon biní durante e resepshon di Meet & Greet na Sao Paulo. E minister a impreshoná ora ku e a hasi su introdukshon na Portugés. Minister Jardim a enfatisá e importansha di kumpli ku e eksigenshanan di FATCA i tambe e konsekuensianan ku ta mará na esaki. E sigiente dia e minister di Finansas di Kòrsou a introdusí e oradó di e seshon di FATCA dilanti di un sala yen.

Spònser prinsipal pa e delegashon di Kòrsou na e konferensha di STEPLatAm 2015 tabata Curaçao International Financial Center Foundation (CIFC) i Curaçao International Financial Association (CIFA). Komo un public private partnership, CIFC ta organisá e tipo di evenemento nan aki i ta trata di stimulá mundu empresarial na Kòrsou – aktivo den e sektor finansiero internashonal – pa bende nan produkto dor di konektá nan mes na Kòrsou komo marka. Otro spònser tabata BK Group, CINEX, DCSX, ENNIA, HBM Group, Sadekya Fiduciary Partners B.V., SAI-Bank, SGG Group, Banko Sentral di Kòrsou i St. Maarten i VBK+CO Fund Services.

Despues di e evenemento na Brasil, Anuschka Cova, e presidente di CIFA, a konta entusiasmá di e partisipashon di Kòrsou na e evenemento importante aki. “Kòrsou a logra di posishoná su mes komo un hurisdikshon sólido i transparente ku ta hasi su máksimo pa keda funshoná konforme eksigenshanan internashonal. Esei riba su mes ta un logro basta grandi. Lokual tambe tabata impreshonante ta ku e minister di Finansas di Kòrsou tabata e úniko minister presente na e konferensha aki (entre otro Bahama’s, Anguilla, Gernsey i Bermuda tambe tabata tei) i e mensahe ku Kòrsou ta haña e servisio finansiero sumamente importante a keda bon trasladá. Alabes e minister por a habri e seshon di FATCA. Durante su introdukshon e la splika e importansha di kumpli ku e eksigenshanan di FATCA, i tambe e konsekuensianan ku esaki por trese ku ne. Na tur, Kòrsou a keda bon representá i nos a risibí hopi kòmplimènt pa nos infrastruktura sólido i e servisionan finansiero amplio ku nos ta ofresé.” Pa mas informashon bishitá www.cifa-curacao.com òf www.facebook.com/cifa.