… No a spar niun energia den  presentá nos isla komo destinashon favorito den Karibe…

WILLEMSTAD- 8 di yüli -2013:- Kòrsou tabata presente durante di e Maracaibo Travel Shop 2013, e feria turístiko mas importante di Venezuela ku a tuma lugar resientemente den e ouditorio di Hotel Kristoff na Maracaibo.  Akohida pa e Expo tabata realmente bon, por a konta ku profeshonalnan den industria i naturalmente públiko interesá den planifikashon di biahe ku tambe por a bishitá e evento di e aña aki. Maracaibo Travel Shop ta un eksposishon na unda ku ta presentá un gran variedat di servisio i produktonan turístiko, e.o hotèlnan, agensianan di biahe, ofisina nan di turismo di kada isla òf país partisipante, transporte pa turista i otro servisionan ku tin influensia riba e biahe, estadia òf eksperensia di e turista. Tabata tin oportunidat di nètwèrk ku ehekutivonan; por menshoná tambe ku tabata tin one-on-one meetings, diferente workshop i tópikonan di interes pa agensianan di biahe. Durante di e Maracaibo Travel Shop di e aña aki, CTB a presentá na bishitantenan i na partnernan den industria e diferente atrakshonnan ku Kòrsou tin pa ofresé komo destinashon tropikal, pero tambe komo destinashon empresarial.  A duna un presentashon di e portofolio di hotèl ku nos tin pa ofresé na Kòrsou i e oportunidatnan di hasi negoshi pa e empresario. No a spar niun energia den  presentá nos isla komo destinashon favorito den Karibe. Ademas di e Expo, tambe por a partisipá na diferente workshop na unda ku e partisipantenan por a disfrutá di diferente aktividat, eksposishonnan artístiko, kultural i musikal.  Riba e di dos dia di e workshop na Maracaibo Travel Shop 2013 a presentá sinku diferente seminario riba turismo presentá dor di Ofisina di Turismo di Kòrsou, Copa Airlines, Baritravel, Education First, Todaraquiba i Discover Bonaire.

*Riba foto athunto por mira parti di e team ku a representá Kòrsou na Maracaibo Travel Shop 2013.