Kòrsou ta sigui kere den Siman di Kultura. P’esei Kas di Kultura ta brinda hinter komunidat di Kòrsou pa di 10 aña kaba: Siman di Kultura !!. Esaki ta tuma lugá di 22 te ku 29 di Sèptèmber 2013. E grupo di enfoke pa Siman di Kultura ta pueblo di Kòrsou en general i spesialmente Bario. Algun di e barionan ku ya a indiká di lo partisipá aktivamente na Siman di Kultura 2013 ta, Mahuma, Wishi/Marchena, Koraal Specht, Kanga/Dein i Santa Rosa. E apertura di Siman di Kultura, ku ta dia 22 di sèptèmber, ta tuma lugá di 5or’ di atardi pa 9or’ di anochi na Sentro di bario Wishi/ Marchena. E klousura lo tuma lugá dia 29 di sèptèmber na Sentro di Bario Koraal Specht, di 9or’ di mainta pa 3or’ di atardi. E aña aki Siman di Kultura su tema ta: ‘Di Abolishon pa Emansipashon’ i e liña kòrá ku lo kore den tur aktividat ta Pasado, Presente i Futuro. Durante Siman di Kultura lo duna tambe oportunidat na alumnonan di skol avansá pa mira e dokumental ‘Nostalgia’, tokante e pianista i kompositor Wim Statius Muller. Por bishitá tambe durante Siman di Kultura e eksposishon ‘Libertat’ den Galeria di Kas di Kultura. ‘Libertat’ ta un eksposishon di 21 artista di arte visual, den kuadro di ‘150 aña Abolishon di Sklabitut’. Galeria Kas di Kultura ta habrí di djaluna pa djabièrnè di 9or di mainta pa 12or di mèrdia i 2or pa mitar di 5 di atardi. I riba djasabra di 10or di mainta pa 1or di mèrdia. Manera kustumbrá Kas di Kultura lo imprimí un buki di programa di aktividat. Di e manera aki tur hende por keda na altura i partisipá na aktividatnan ku lo bai tin durante di Siman di Kultura 2013. E buki lo ta kla pa mas tardá djabièrnè awor 20 di sèptèmber. Kas di Kultura ta hasi un yamada na tur famia, bario, radio emisora, kanal di televishon, skol, empresa di gobièrnu, empresa privá, instituto, grupo kultural i artista pa “ Hasi grandi bo kultura i alsa bo Nashon” i partisipá aktivamente na Siman di Kultura 2013. Ban laga kultura di Kòrsou sigui brota den tur skina di Kòrsou, di 22 pa 29 di Sèptèmber 2013 selebrando 10 aña Siman di Kultura di Kòrsou!