Manera ya ta konosí nos selekshon nashonal lo tin ku enfrentá El Salvador den e terser buèlta di e weganan pa eliminatorio pa mundial Rusia 2018. E promé partido lo tuma lugá aki na Kòrsou djabièrnè 4 di sèptèmber den Stadion Ergilio Hato (SDK) miéntras e segundo partido lo tuma lugá aya na El Salvador den ‘Estadio Cuscatlán’ djamars 8 sèptèmber próksimo. For di wikènt aki e karchinan lo ta na benta na e lokèt nan di SDK durante e partidonan di Liga MCB Promé Divishon. Miéntras e karchinan lo ta ofisialmente na benta entrante djaluna 10 di ougùstùs, na tur e diferente puntonan di benta, pa e partido ku lo tuma lugá djabièrnè 4 di sèptèmber próksimo aki na Kòrsou. E preisnan ta lo siguiente;

• VIP ta kosta Nafl. 500,- (inkluí konsumo); (maksimal 500 persona)
• Bou di tribuna kubri ta Naf.100,- (maksimal 1000 persona)
• Bou di tribuna kubri parti Festival Center ta Nafl.75,- (maksimal 1000 persona)
• Tribuna no kubri ta Nafl.30,- te ku 31 di ougùstùs, promé di sèptèmber e karchinan lo bira Nafl.35,-. Den e sekshon aki mucha te ku 12 aña i 60+ ta paga Naf.20.- (maksimal 8000 persona)

Karchinan ta optenibel na FFK bou di ora di ofisina, na Pòmp di gasolin Sta Maria, Botika Mampuritu, 4th of July na Barber, Mensing’s Caminada, na tur filial di C-Post N.V.  i na Beep Beep Rio Canario. Benta di suèter i shal ta kontinuá na FFK na balor di 35 i 25 florin. Un súplika ta bai na abo, komo e number 12 ku no tin bo suèter òf shal ainda pa kumpra esaki paso e ora 0 ta yegando! Nos ta pidi tur fanátiko, e number 12, pa kumpra bo karchi trempan pa bin sostené i apoyá nos selekshon nashonal komo e number 12! Nos selekshon i nos hungadónan ta konta kubo sosten masal den SDK djabièrnè 4 di sèptèmber!