Kòrsou ta rumbo pa Rusia 2018! Kaminda nos selekshon nashonal lo bai topa Cuba próksimamente! Mañan, djabièrnè 5 di yüni, Kòrsou vs Trinidad!


Preparashonnan ta den ful swing pa e promé wega den e segundo buèlta di e weganan pa eliminatorio pa mundial Rusia 2018 kaminda nos selekshon nashonal lo enfrentá Cuba dia 10 di yüni binidero, 8or di anochi den Stadion Egilio Hato (SDK). E segundo partido lo tuma lugá aya  na Cuba den stadion Pedro Marrero pa 4or di atardi dia 14 di yüni próksimo. Den kuadro di e preparashonnan ei, djabièrnè dia5 di yüni binidero lo bai tin e di 2 wega di fogeo entre nos selekshon i Trinidad kual lo tuma lugá aki na Kòrsou, 8or di anochi na SDK. E wega aki lo kosta fl.10 pa hende grandi i fl.5 pa mucha te ku 12 aña ku 60+. Karchi pa e partido aki lo ta na benta na ofisina di FFK bou di ora di ofisina i na takianan di SDK promé ku e enkuentro aki. Porta nan lo habri for di 7or di anochi. Awe tardi un delegashon di nos selekshon i staf lo den Building Depot di 6or pa 8or di anochi pa asina por interkambiá ku e públiko amante di futbòl. Tambe lo tin oportunidat pa kumpra karchi pa e wega kontra Trinidad i Cuba. Lo tin posibilidat pa kumpra e suèter di nos selekshon i e shalnan tambe i lo tin hopi pakete atraktivo pa tur ku ta interesá na kumpra sea karchi, suèter òf shal. Karchinan ya ta na benta i e preisnan pa karchi pa e diferente sekshonnan ta lo siguiente:

  • VIP ta kosta Naf. 250,- (inkluso konsumo)
  • Bou di tribuna kubri ta Naf. 55,-
  • Bou di tribuna kubri parti Festival Center ta Naf. 40,-
  • Tribuna no kubri ta Naf. 30,-
  • Den e sekshon di tribuna no kubri mucha te ku 12 aña i 60+ ta paga Naf. 15.-

 

Karchinan ta optenibel na FFK bou di ora di ofisina, na Pòmp di gasolin Sta Maria, Botika Mampuritu, Beep Beep i na tur filial di Cpost International N.V. Tambe por kumpra bo karchi online riba www.righttothedoor.com. Tambe nos a introdusí e shalnan di nos selekshon nashonal ku ta na benta na balor di fl.25 ku ta optenibel solamente na FFK bou di ora di ofisina. Esaki ta un inisiativa algun 2 studiante, kende ta Christopher Braam i Nizam Martina, ku pa un proyekto pa nan estudio a diseñá e shalnan aki spesial pa e wega nan aki. E suèter nan di nos selekshon ta optenibel na FFK, bou di ora di ofisina, na Fiesta Paradise, Pomp di gasolin Sta Maria i tambe na Beep Beep na rason di fl.35. E suèter nan ta kuminsá na size S i ta yega te na 3 XL. Tambe tin size pa mucha manera size 8, 10, 12, 14 i 16. KORDA KU NO POR ‘SWIPE’ NA FFK! Un i tur ta keda enkurashá pa kumpra nan suèter, karchi i shal trempan debí ku ta spera un yeno kompleto pa e partido aki. Nos selekshon i nos hungadónan ta konta kubo sosten masal den SDK dia 10 di yüni pa 8or di anochi!