Manera ya ta konosí nos selekshon nashonal lo tin ku enfrentá Cuba den e segundo buèlta di e weganan pa eliminatorio pa mundial Rusia 2018. E promé partido lo tuma lugá aki na Kòrsou dia 10 di yüni 8or den Stadion Ergilio Hato (SDK) miéntras e segundo partido lo tuma lugá aya na Cuba den stadion Perdo Morero pa 4or di atardi dia 14 di yüni próksimo. Nos selekshon lo bai kuminsá prepará pa e 2 kompromisonan aki, aya na Hulanda entre 18-20 di mei kaminda e trainingnan nan lo kuminsá i dia 20 di mei nos selekshon lo bai hunga un wega di fogeo na Hulanda kontra di Sürnam. Nos staf tékniko i e hungadónan residensiá na Kòrsou lo sali for di Kòrsou dia 17 di mei i ta regresá 21 di mei for di Hulanda pa kumpli ku e training nan aki na Kòrsou. E mesun dia ei, esta 21 di mei Sr. Patrick Kluivert lo publiká e lista di tur e hungadónan ku a wòrdu invitá pa partisipá na nos selekshon nashonal ku lo tin ku enfrentá Cuba. Ta e intenshon pa dia promé di yüni e trainingnan start aki na Kòrsou kaminda nos hungadónan lokal lo djòin nos hungadónan internashonal. Durante e trainingnan aki na Kòrsou tambe lo tin un wega di fogeo pa prepará pa e wega di 10 di yüni. Nos selekshon ta sali dia 12 di yüni mainta i lo entrená e dia aki mes komo preparashon pa e di 2 wega dia 14 di yüni 4or di atardi na Cuba den stadion Pedro Morero i nan lo regresá djaluna, 15 di yüni. Interes den e pueblo ta sumamente haltu pa asistí na tantu e partido ku lo tuma lugá aki na Kòrsou komo esun na Cuba, p’esei nos ke rekomendá tur hende ku ke bai Cuba pa presensia e wega aki i apoyá nos selekshon nashonal rumbo pa mundial Rusia 2018, pa tuma kontakto ku Insel Air òf un agensia di biahe pa asegurá bo lugá. Entrante djarason, 6 di mei karchinan lo ta na benta pa e partido ku ta tuma lugá 10 di yüni próksimo aki na Kòrsou. E preisnan ta lo siguiente;

• VIP ta kosta Nafl.250,- (inkluí konsumo);
• Bou di tribuna kubri ta Naf.55,-
• Bou di tribuna kubri parti Festival Center ta Nafl.40,-
• Tribuna no kubri ta Nafl.30,- i den e sekshon aki mucha te ku 12 aña i 60+ ta paga Naf.15.-

Karchinan ta optenibel na FFK bou di ora di ofisina, na Pomp di gasolin Sta Maria, Botika Mampuritu i na Beep Beep. Nos ta pidi tur fanátiko, e number 12, pa kumpra bo karchi trempan pa bin sostené i apoyá nos selekshon nashonal komo e number 12! Nos selekshon i nos hungadónan ta konta kubo sosten masal den SDK dia 10 di yüni pa 8or di anochi!