…Pa di tres aña konsekutivo:…

WILLEMSTAD- 13 di mart 2014:- Kòrsou ta sigui destaká den merkado di turismo Europeo ku otro nominashon importante. Pa terser aña konsekutivo nos isla ta risibí un nominashon pa Zoover Awards, esaki den kategoria ‘Vliegvakantie buiten Europa’. Dos aña siguí Kòrsou a risibí e premio máksimo komo destinashon faborito di e turista hulandes i e aña aki tambe lo hasi esfuerso máksimo pa risibí e premio aki. Zoover Awards a wòrdu organisá pa promé biaha na aña 2009 i ta konosí komo e enkuesta di mas popular i importante entre e lidernan den industria di biahe Europeo. Loke ta hasi e premio aki unu importante ta ku tur hende rònt mundu por vota pa nan destinashon preferí. Ku kada votashon pa e Zoover Awards, nos ta risibí e oportunidat pa posishoná Kòrsou komo un destinashon lider den Karibe. For di 26 di febrüari último a habri oportunidat pa vota via di e wepsáit di Zoover Awards kual ta www.zooverawards.nl. Votashon ta sera dia 8 di aprel próksimo. E ganador lo ser anunsiá dia 17 di aprel. Kada bes ku risibí un nominashon pa un Zoover Award òf kualkier otro premio internashonal ta momentu pa huntu komo pais nos demostrá ku nos ta orguyoso di nos isla komo produkto turístiko. Ofisina di Turismo di Kòrsou (CTB) ta motivá komunidat di Kòrsou pa ban vota pa Kòrsou, pa asina nos risibí e premio máksimo di Zoover Awards pa di tres aña konsekutivo. Kòrda ku posibilidat pa vota ta sera dia 8 di aprel próksimo.